Sekretaria Estadu ba Promosaun Igualidade (SEPI), Idelta Maria Rodrigues, hateten selebrasaun loron nasional feto ba tinan ida ne’e konsentra deit iha nasional, tanba orsamentu limitadu.
SE Rodrigues dehan, selebrasaun ba tinan ida ne’e uniku kompara ho tinan hirak ba kotuk, tinan ida ne’e sei iha atividade barak, ho objetivu motiva partisipasaun feto iha prosesu dezenvolvementu.
Tuir planu,eventu ne’e sei akompanha direitamente reprezentante husi nasaun sira iha Asia tomak inklui mos Portugal, Norwegia, Fiji, Irlanda no Australia.
“Tinan –tinan ami selebra iha distritu hotu maibe tinan ida ne’e lae diferensia oituan distritu sira mak mai fali iha nasional,” SE Rodrigues dehan, iha Palasiu Governu, Dili.
Atividades hirak ne’ebe iha sei hahu hala’o iha dia 04 to’o 08 Novembru, mak hanesan feira FIAR ba produtu grupu feto sira, Misa, Karii aifunan ba heirona sira iha Metinaro, Konsertu musika (Nasional no Internasional-Indonezia) no entrega premiu Gender Award ba manan nain sira.
Maske selebrasaun konsentra deit iha nasional, maibe nia dehan, SEPI mos sei koalia ho administrasaun RTTL. Ep atu bele halo transmisaun direita ba eventu ne’e, nune’e ema hotu liu –liu inan feto sira iha area remotas bele akompanha progresu no dezafius ne’ebe governu hasoru iha promosaun igualidade.
Iha parte seluk, Prezidente Grupu Feto Parlamentar (GMPTL), sente triste tanba governu abandona tiha feto sira iha area rural no fo liu atensaun ba feto sira iha sidade no distrital nia laran.
Nia dehan, GMPTL sei hala’o programa halo dialogu ho feto sira iha area remotas, ne’ebe sei hala’o iha dia 15 Outubru 2013, tanba ne’e sira sei koopera ho SEPI.
“Selebrasaun barak liu iha nasional no aktividade mos maibe feto barak mak soe oan, tara an, prostituisaun buras, ida ne’e mak SEPI tenke hakfodak hodi koopera ho organizasaun feto sira atu kombate ida ne’e, la’os halo diskursu deit,” Prezidente GMPTL, Josefa Alvares Soares dehan.
Tuir nia, iha eventu hanesan ne’e importante tebes atu halibur hamutuk ho feto sira iha area rural, rona sira nia preokupasaun tanba feto sira iha area rural ne’e vulneravel liu, susar asesu ba edukasaun, saude, justisa, bee moos no seluk tan.
Entretantu, espouza Sekretariu Estadu Politika Formasaun Profesional no Empregu (SEPFOPE), Ana Maria Antonia Smith, apoia inisiativa GMPTL nian ne’e, feto sira iha area rural mos sente importansia ba loron ida ne’e no sira mos bele hato’o sira nia preokupasaun no sentimentu nudar feto ba loron ida ne’e.
