Membru Parlamentu Nasional sujere ba meja parlamentu atu aselera lalais prosesu harii edifisiu foun Parlamentu Nasional ninian ne’ebe to’o agora seidauk klaru, tanba edifisiu atual klo’ot liu. 
Deputada Jacinta Pereira Abu Cau, hateten molok mandate terseira lejislatura remata, edifisiu foun ne’e tenke iha ona.
“Ami fo ezemplu deit hanesan Komisaun D ninian wainhira ami halo audensia hasoru malu ho trabalhadores sira husi kompania lubuk ida ami iha fatin ne’e dudu malu los,” Deputada Pereira preokupa, iha Parlamentu Nasional.
Deputada ne’e dehan ,momentu komisaun D halo audensia ho trabalhador sira fatin la to’o atu trabalhador sira tur.
“Ita tenke iha duni edifisiu foun ida ne’ebe mak diak, atu bele dignifika orgaun soberanu ne’e, molok mandatu ida ne’e remata,” Deputada Abu Cau dehan.
Iha fatin hanesan Deputadu Joaquin dos Santos, lamentavel ho prosesu harii edifisiu foun PN ne’e, tanba maske tama ona ba segundu ano mandatu terseira lejislatura ninian, maibe to’o agora seidauk halo lansamentu ba primeira pedra ba edifisiu foun.
“Ita moe bo’ot, moe,” Deputadu husi bankada Fretilin ne’e lamentavel.
Tanba ne’e nia husu ba Meja Parlamentu atu klarifika, tanba planu ida ne’e desde iha I lejislatura nian to’o agora seidauk iha rezultadu.
“Prezidente sala ne’e iha ne’ebe no se mak halo sala ne’e,” Deputadu ne’e husu klarifika.
Hatan ba kestaun ne’e Prezidente Parlamentu Nasional (PN), Vicente Guteres, katak iha primeira lejislatura nian katak identifika ona rai iha Hera atu halo edifisiu, maibe tanba entermus seguransa la seguru mak kansela tiha .
Depois mandatu II lejislatura nian buka fali rai iha Statua Joao Paulo II nia sorin halo tiha estudu preliminariu, maibe nia kustu finanseiru mak bo’ot liu.
“Tanba ne’e mak Primeiru Ministru dada iis los, entaun aranja fali terenu ida iha antigu Aero Portu Dili iha Palasiu Prezidenti Republika, Aitarak laran ne’eba,” Prezidente PN ne’e dehan.
Nia dehan, estudu preliminariu ba espasu ne’e halo tiha ona.
“Ita sei avansa tan maibe relasaun iha terenu entermus formais ofisiais seidauk entrega,” nia katak.
