Sekertariudu Estadu ba Eletrsidade iha ona planu atu harii sentral eletrika ida iha distritu Oe-Cusse,ho objetivu nune’e bele atrai setor privadu sira atu halo investementu iha distritu ne’e.
Diretor Jeral Eletrisidade, Virgilio Guteres, hateten planu ida ne’e tama ona iha planu tinan 2014 ninian.
“Ne’e tama ona iha master plan ,agora saida mak eletrisidade atu halo mak atu asegura eletrisidade ba iha dezenvolvementu master plan ninian iha Oe-Cusse,” DJ. Guteres informa, iha Kaikoli, Dili.
Entretantu Prezidenti Komisaun E (infraestrutura, transportes no komunikasaun), Deputadu Pedro da Costa , hateten distritu Oe-Cusse presiza sentral eletrika ne’ebe ketak, atu nune’e bele fasilita master plan ne’ebe iha ona.
“Ami ba inagura Portu Mahata ne’ebe tau naran Iwao Kita-Hara,ami ba hare fatin atu instala sentral ida iha ne’eba besik Sakato rai kuaze hectares hat,” Deputadu da Costa katak.
Tuir planu governu nian katak,provizoriu sei mobiliza jerador iha Sentral Comoro nian ba iha Oe-Cusse, atu nune’e bele garante fornese ahi ba komunidade sira.
Deputadu ne’e realsa tan katak ,planu governu nian atu harii Sentral Eletrika iha Oecuse nia kapasidade 20 mega watt depois uja 10 mega watt no 10 mega watt rezerva.
“Agora dadauk sentral antigu ne’e agora lakan mate difikulta populasaun sira tanba ne’e governu mai hato’o tiha ona mai parlamentu nasional ba Komisaun E katak sira sei mobilija jerador balun iha Sentral Komoro ne’e ba iha ne’eba atu garante eletrsidade 24 horas ba distritu ne’eba,” Deputadu da Costa hato’o.
Iha sorin seluk Deputadu Bankada FRETILIN, Manuel Castro sublina katak, governu tenke harii Sentral Eletrika iha ne’eba, tanba Oe-Cusse hetan ona autonomia espesial ba master plan.
“Hau hanoin katak tinan oin sira tenki hahu ona tanba eventu ida iha 2015 nian atu hahu,”Castro sujere.
Tuir fiskalizasaun Komisaun E nian ba iha distritu Oe-Cusse identifika katak,area Pasabe no Nitibe komunidade sira la asesu ba eletrisidade.
“Ita hare ba sira nia moris izoladu tebes, entaun presiza fornese ahi ba sira,” Deputadu ne’e rekomenda.
