Administrador Distritu Dili Gaspar Soares, hateten kareta Servisu Agua Saneamentu (SAS) distritu Dili barak mak at no paradu, tanba orsamentu ba manutensaun nian laiha.
“Konsekuensia mak kareta estadu barak mak paradu,” Administrador Soares dehan, iha Dili.
Alem de ne’e, nia informa, sira mos iha limitasaun ba komputador hodi fasilita servisu, tanba komputador ne’ebe uluk doasaun husi UNTAET, agora kuaze la funsiona ka at hotu ona.
Entretantu Deputadu husi bankada Congresu Nasional Rekonstrusaun de Timor (CNRT), Manuel da Costa Guteres, hateten ne’e failansu Ministeriu Administrasaun Estatal (MAE) nian.
“Estatal hatene ona, katak kuandu entrega ona kareta ba iha Administrador ida, konserteza tenke hatama mos orsamentu jeral do estadu ba manutensaun nian,” Deputadu Guteres dehan.
Deputadu ne’e, dehan orsamentu manutensaun ba kareta administrasaun nian tama iha planu MAE ninian.
“Se intrega tiha ba kareta mak la iha preve orsamentu atu hadia kareta kerdijer hatudu katak estatal mak la iha planu,” Deputadu Guteres katak.
Enkuantu bainhira Jornalista koko konfirma asuntu ne’e ba iha Ministru Administrasaun Estatal, Jorge da Conceicao Teme liu husi nia Asesora Jacinta Hanjam, katak iha tempu badak sei rezolve problema ne’e.
“ Ami sei haree problema ne’e iha tempu badak nia laran,” Asesora Hanjam dehan.
