Membru Parlamentu Nasional husu ba governu atu hapara importasaun bee aqua mai rai laran, tanba Timor-Leste mos riku ho bee moos.
Deputadu, Francisco Branco, hateten tempu to’o ona ba Timor –Leste atu halo selesaun ba produtu importasaun sira liu –liu bee aqua ne’ebe to’o agora sei importa husi rai liur.
“Kontainer sira lor-loron mai husi rai seluk ne’e fila mamuk deit, hau hanoin ita tenke hare didiak, tanba Timor-Lleste riku bee moos liu duke rai seluk,” Deputadu Branco dehan, iha Parlamentu Nasional.
Nia hatutan, katak governu tenke komesa ona halo selesaun ba produtu importasaun sira husi liur no emprezario Timor oan sira hanoin ona atu investe iha buat ne’ebe Timor –Leste iha, labele produtu hotu depende deit husi nasaun seluk.
Nia dehan, produtu ne’ebe la merese ona atu importa apoiu deit seitor privadu sira atu investe mak hanesan be aqua, plastiku no nesesidade baziku seluk tanba liu husi produtu importasaun sira ne’e mos bele fo impaktu ba saude publiku nian tanba lixu bele nakon iha rai laran hamosu inundasaun.
Iha parte seluk, Sekretaria Estado para Apoiu e Promosaun Setor Privadu, Veneranda E. M.
Lemos Martins konkorda no sira sei esforsu atu halo promosaun diak liu tan hodi investedor sira bele mai investe iha rai laran.
“Hau hanoin dala ida ne’e fo motivasaun ba setor privadu atu halo re-investementu ba fabrika bee moos nian ne’ebe ida ne’e diak tebes,” SE Lemos apoia.
Nia informa, katak durante tinan ida ne’e iha ona investedor nain 18 mak hetan ona sertidaun investimentu atu investe iha rai laran, ho aktividade oi-oin inklui mos produsaun bee moos.
Investedor sira ne’e sia mai husi investedor estrangeirus no nain sia mai husi investedor nasional sira ne’ebe atu investe iha rai laran, atu bele minimize selu ba taxa importasaun.
“Se ita investe iha Timor (Dili) ida ne’e it abele hetan injesaun taxa durante tinan lima ita laselu taxa ba importasaun sasaun ne’ebe relasiona ho atividade investimentu,” SE Lemos katak.
