Tuir planu Ministeriu Edukasaun sei loke tan eskola politekniku tolu hanesan Politeknika Agrikultura, Politeknika Hotelaria no Turismu no Politeknika Enjinaria inklui Akademia de Peskas nian.
Politeknika hirak ne’e sei hari’I iha Distritu Lautem, Dsitritu Manatutu no mos Distritu Suai.
“Politeknika tolu konaba Turismu no Hotelaria sei hari’I iha Lospalos ne’ebe fulan kotuk komunidade iha ne’eba fo ona rai hektares 10 iha eis Asrama 745 nian. Politeknika Agrikultura nian sei hari’I iha Betano no Politeknika Enjinaria iha Suai. No ikus liu Akademia [de Pescas] iha Manatutu ne’ebe rai mos entrega hotu ona,” hateten Diretor Jeral Ensino Superior husi Ministeriu Edukasaun, Abrao dos Santos,iha Salaun Eis CNRT Balidi Dili foin lalais.
Diretor dos Santoshateten tan katak oras ne’e dadauk ministeriu prepara ona atu konvida ema peritu sira atu halo dezenu ba modelu politeknika nian.
“Ida ne’e mak preokupasaun parte ami Ministeriu Edukasaun liu-liu ba diresaun jeral ensino superior ninian oinsa para hato’o ba sua exelensia vise primeiru ministru karik iha orsamentu jeral do estadu 2014 bele aprova hodi hahu ona lansamentu primeiru pedra.”
Proposta ba eskola politeknika tolu ne’e tama ona iha proposta orsamentu jeral do estadu 2014 nian atu diskuti.
“Kuandu Orsamentu Jeral do Estadu 2014 nian mak aprova ona husi parlamentu nasional ita bele hahu ona konstrusaun,” Diretor dos Santos hato’o.
Iha fatin hanesan Vise Primeiru Ministru, Fernando Lasama de Araujo, iha nia intervensaun hato’o katak problema edukasaun no saude liga ba ema nia moris loro-loron presija atu nakloke.
“Hau hatete ba sira hotu-hotu ne’ebe servisu iha ministeriu edukasaun tenki sadar katak,se-se mak baruk ten servisu diak liu ba buka servisu seluk,” Vise PN Lasama hato’o.
Tanba ne’e Vise PM husu ba fusnionariu tomak iha Ministeriu Edukasaun tenki haka’as an servisu atu nune’e bele rezolve problema ne’ebe mak nasaun infrenta.
“Hau husu ba sira mak ne’e nudar Timor oan tenki haka’as an maka’as liutan.”
Iha sorin seluk, Jose do Santos, Estudante UNTL nian informa katak,planu governu nian ne’e diak oinsa mak bele habelar universidadeiha distritu sira atu nune’e estudante finalista ensinu sekundariu sira bele kontinua sira nia estudu iha ne’eba.
“Durante ne’e ita hare’e realidade estudante hotu-hotu kontinua sira nia estudu halai hotu mai iha Dili maibe hau hanoin planu ida agora ne’e diak oinsa mak inan aman sira bele haruka nia oan sira bele eskola iha distritu sira,” Estudante dos Santos hato’o.
Estudante ne’e mos sujere ba Ministeriu Edukasaun atu loke universidade iha distritu hotu atu nune’e estudante finalista sira bele kontinua sira nia estudu iha distritu.
