Ministerio Saude husu ba Ministerio Turismu Komersio e Ambiente (MKIA) atu hasae taxa importansaun sigaru atu minimiza numeru konsumu sigaru iha rai laran liu–liu ba lararik minoridade sira.
Tuir Diretur Jeral Ministerio Saude, Jose Reis Magno, katak Timor –Leste sai ona membru ba konvensaun internasional kontra tabaku (sigaru) maibe susar oituan atu bandu ema fuma iha fatin publiku tanba liga ho ema nia hahalok entau presiza tempu.
“Ami hanoin hela atu bele iha politika ida maibe ita atu bandu ema labele fuma ne’e difisil maibe importante hasae taxa importansaun sigaru nian tenke a’as,”dehan DJ Magno iha knar fatin Kaikoli Dili foin lalais.
Nia rekuinese katak iha taxa ba nasaun ida tenke iha importansaun mos maibe importante mos atu proteje jerasaun foun sira husi impaktu sira ne’ebe estraga saude iha longu prazu.
Nia hatutan katak ministerio saude kontinua fahe informasaun liu husi kampanha, diskursu no meius seluk bakomunidade sira katak sigaru ne’e ladiak ba ema ne’ebe fuma no ema ne’ebe horon suar nia saude.
Nia informa mos meius ida sosializasaun ida mak liu husi instituisaun governu nian ou lideransa sira katak forum ida ne’ebe dehan labele fuma ne’e labele fuma duni atu hatudu ezemplu diak ba jerasaun foun sira se lae difisil.
Entertantu, Membru Parlamentu Nasional, Deputada Ilda Maria da Conçeicão, konkorda ho ministerio saude atu hasa’e taxa ba importasaun sigaru ne’e obrigasaun governu tenke halo tanba Timor–Leste ratifika ona konvensaun internasional kontrola tabaku.
Nia hatutan katak politika ida ne’e diak atu minimiza numeru konsumu tabaku tanba oras ne’e dadaun labarik minoridade sira mos konsume tabaku kada loron tanba sira bele sosa.
“Diak liu hola hahan duke gasta [ossan] ba sigaru.”
Iha parte seluk, Chefe Departamentu Risk Management and Compliances Alfandega, Lourenco Carvalho, hateten katak tabaku hanesan mos impostu selektivu seluk inklui mos importu ba tua manas sira tuir lei tributaria numeru 8/2008 tabacco ho presu $19 per kilogram.
Nia hatutan katak iha Timor-Leste taxa importasaun ne’ebe bo’ot liu mak kona ba importasaun kilat no kilat-musan ho 200% atu prevene ema labele hola kilat arbiru so governu deit mak bele.
