Membru Parlamentu Nasional, Deputada Ilda Maria da Conceicao husu ba Sekretaria Estadu ba Promosaun Igualidade atu labele hili malu bainhira estabelese komisaun avaliasaun no kriterius ba ‘Gender Award’ ne’ebe sei realize iha fulan Novembru tinan ne’e.
Tuir nia, Gender Award ne’e diak, tanba atu fo apresiasaun ba ema individu sira ne’ebe kontribui ba promosaun igualidade iha rai laran.
“Ba hau, hau kontente tebes mais tenke iha kriteria los no aplikantes sira tenke hatudu duni didikasaun ba area espesifiku ida ne’e,”Deputada Ilda esperansa, iha Parlamentu Nasional.
Nia hatutan, ekipa avaliasaun mos bele halo avaliasaun bazeia ba krietria ne’ebe iha, nune’e premiu ne’e fo duni ba ema ne’ebe merese duni atu hetan apresiasaun ne’e, la’os tanba hili malu ou tanba konese malu.
Hatan ba kestaun ne’e, Xefe Departamentu Ligasaun SEPI, Henrique da Silva, hateten sira loke ona vagas ho kriteira ne’ebe klaru ba aplikantes sira ne’ebe iha interese atu aplika no sira mos estabelese ona komisaun avaliasaun atu halo avaliasaun ba dokumentus aplikantes sira bazeia ba kriteria ne’ebe iha.
Nia dehan, iha kriteira lima ba aplikantes sira atu konsidera, hanesan aplikante tenke sidadaun Timor oan ho idade 17 ba leten, iha obrigasaun atu hatama Curriculum Vitae no tenke iha konesementu kona ba igualidade jeneru.
“Ita hakarak oinsa atu fo apresiasaun ba sira liu –liu ba individual sira ne’ebe durante ne’e servisu maka’as hodi kontribui ba promosaun igualidade jeneru nian,” da Silva dehan.
Nia hatutan, programa Gender Award ba tinan ida ne’e diferente ho tinan lima kotuk, tanba iha tinan hirak liu ba sira fo deit apresiasaun ba ministerio no sekretario estado sira ne’ebe hatudu progresu diak ba implementasaun politika abordajen integradu jeneru la inklui ema individual sira.
Tuir planu programa fahe premiu ba ministerio, sekretario estado no ema individu sira ne’ebe kontribui ba promosaun igualidade jeneru ne’e sei hala’o iha dia 8/11/2013 relasiona ho loron nasional feto ne’ebe monu iha dia 3 fulan Novembru tinan ida ne’e.
