Atu reprezenta no promove Timor-Leste ba iha mundu, Prezidente Republika, Taur Matan Ruak a fo posse ba Heranio Coelho sai Embaixador Timor-Leste ba iha Korea do Sul.
“Ita hotu hatene Korea nia papel iha 1999 depois referendum to’o mai agora dadauk Korea pais ida importante iha ita nia rejiaun Asia Timor ninian,” dehan Coelho, hafoin simu pose iha Palasiu Prezidente Aitarak laran Dili,(05/09/2013).
Tuir nia, prezensa Timor-Leste nian iha Korea parte ida mos ba Timor-Leste atu tama ba ASEAN.
“Hau hanoin asuntu sira ne’e importante liu atu ita hotu tenkieharee entermus de interaksoens,kooperasaun sira ne’ebe posivelmente, ita tenke dezenvolve agora no ba oin ninian,” Embaixador foun ne’e katak.
Nia hateten, evolusaun Korea komesa iha 1948 depois hetan nia independensia . Iha rai seluk mos uluk ukun Korea depois segundu gerra mundial mak foin hetan nia independensia.
“Ne’eduni ita nia prezensa iha ne’eba no sira nia prezensa iha ne’e sei kontribui ba ita nia intendimentu diak liu kona ba saida mak sira sei halo ba tempu ida ne’e,”Embaixador TL ba Korea ne’e katak.
Nia esplika ,prezensa Timor-Leste iha Korea importante tebes, tanba trabalhador Timor oan barak mak oras ne’e dadauk servisu iha Korea presiza tau matan.
“Hau hanoin asuntu sira ne’e ita sei hare liu husi ita nia estadu ba ita nia enkuadramentu buat ne’ebe ita iha ho Korea,” Coelho katak.
Embaixador ne’e ne’e realsa tan katak,planu kooperasaun entre Timor-Leste ho Korea mak estratejia nasaun parseru (Country Partenrship strategy) ne’ebe mak sei halo iha 2015.
Entretantu Prezidente Taur Matan Ruak (TMR), hateten Korea nudar nasaun ida ne’ebe mak fo nia kontribuisaun tomak pasifika ba Timor-Leste desde tinan 1999.
Prezidente TMR hatutan, kooperasaun Timor-Leste ho Korea durante ne’e la’o kapas tebes tanba bele simu trabalhador Timor oan barak mak horas ne’e dadauk servisu iha Korea.
TMR sublina tan katak, faze ida agora Timor-Leste tenke desimina nia an ba pais sira seluk kona ba vizaun Timor nian.
“Senhor embaixador misaun ne’ebe importante los laos deit reprejenta deit ita nia nasaun deit maibe iha ne’eba hodi promove intrese ita nia pais nian ba nasaun sira seluk hodi lori interese nasaun seluk nian ba ita nian nasaun iha faze ida ne’ebe krusial tebes ba dezenbolvimentu ekonomika,” Prezidente TMR dehan.
