Sekretariu Estadu Politika Formasaun Profesional e Empregu organiza feira kareira profesional iha teritorio tomak, ho objetivu atu fasilita informasaun ba estudantes finalista sekundario sira hodi halo desizaun ba sira nia an bainhira remata sekundario. 
Sekretariu Estadu Politika Formasaun Profesional e Empregu (SEPFOPE), Ilidio Ximenes da Costa, iha feira ne’e fo informasaun kompletu husi universidade hotu, sentru formasaun, setor privadu inklui mos forsa armada no polisia.
“Fo oportunidade ba estudantes sira atu deside no eskoila ba sira nia an, tanba ne’e vokasaun entau sira mak deside atu ba universidade, forsa armada, polisia ka tuir formasaun vokasional ruma,” dehan SE Ximenes, hafoin halo abertura ba feira Kareira Profesional iha Sentru Treinamentu Don Bosco, Comoro Dili.
Nia hatutan, atividade feira ne’e parte ida husi programa planu annual SEPFOPE nian, tanba ne’e ba tinan ida ne’e sira sei tau orsamentu ne’ebe sufsiente ba atividade ida ne’e no sei aumenta tempu ba atividade ne’e tanba loron ida deit la sufsente ba estudantes sira hodi foti desizaun.
Orsamentu ba atividade feira kareira profesional tinan 2013 ne’ebe halao iha distritu Baucau, Bobonaro, Oe-cusse, Ermera, Dili ho montante orsamentu $ 29.000 ne’ebe apoiu husi Internasional Labour Organizasaun (ILO).
Iha fatin hanesan, Vice Ministru Ensino Superior, Marçal Avelino Ximenes hateten katak aktividade feira ne’e importante tebes ba estudantes sekundario sira hotu atu rona no hare hodi esfosru an aprende no domina sensia ruma hodi foti desizaun ba sira nia futuru.
Nia informa mos katak iha bolseirus barak mak nia estudu la lao ba oin tanba sira la domina sensia bazika sira iha ema nia nasaun atu aprende kona ba komputador tenke domina uluk sensia bazika hanesan fisika, matematika no kimika entau sei difisil atu avansa.
“Realidade Ita haruka ita nia estudantes sira ba iha Filipina, Portugal desde 2001 to’o agora sira dudu la ba tanba ita la domina sensia bazika,” dehan Vice Marçal.
Entertantu, Estudantes Arnaldo Fernandes agradese tebes ba iha SEPFOPE ne’ebe organiza ona feira ne’e ba sira atu hetan informasaun ruma hodi deside sira nia futuru tanba iha informasaun mak foti desizaun.
Nia dehan iha informasaun foun barak mak nia parte hetan iha feira ne’e hanesan bolsu estudu husi Telcomsel, kona ba makro elektronik, IT, servisu no material forsa maritime nian no polisia inklui mos formasaun seluk tan.
“Hau hanoin ida ne’e hanesna oportunidade ida diak tebes mai ami atu hanoin no deside ami nia futuru aban bainrua nian karik iha oportunidade hau hakarak sai forma maritime,” dehan estudantes terseiro ano ne’e.
