Dadaun ne’e Ospital Nasional Guido Valadares (HNGV) halo transfere pasiente rins nain neen halo operasaun Cimino/AV-SHUNT iha Indonezia, hafoin ne’e sira bele tuir tratamentu fase ran ho permanente iha HNGV. 
Diretor Interino Klinika HNGV, Isodoro da Silva, hateten ospital nasional so bele halo atendementu fase ran permanente ba pasiente sira ne’ebe monta ona Cimino/AV-SHUNT, enkuantu ba sira ne’ebe seidauk tenke ba halo iha Indonezia lai.
“Agora dadaun sira hela iha ne’e nain 17 mak fase ran permanente iha nain 6 foin dadauk ita haruka ba liur Indonezia atu monta Cimino /AV-SHUNT hodi fase ran permanente,” Doutor da Silva katak, iha Bidau, Dili.
Nia hatutan, tratamentu fase ran la’os atu pasiente sira diak los maibe atu ajuda fase virus sira ne’ebe iha pasiente sira nia isin durante sira nia moris, tanba sira nia rins la funsiona.
Nia dehan, moras rins bele kauza husi genetika (keturunan) ou kauza husi moras seluk hanesan tensaun as no ran midar.
Tuir nia, to’o agora sira seidauk haruka pasiente rins ida atu halo transplatasaun rins iha liur, tanba prosesu naruk no presiza orsamentu ne’ebe bo’ot no la fasil atu hetan pendonor sira.
Entretantu Diretor Nasional Apoiu Servisu Hospitalar e Encaminhamento, Horacio Sarmento da Costa, hateten iha tinan 2013 ne’e sira halo ona referral ba pasiente hamutuk 125 ba iha ospital Sangla Bali, Darmo no Sutomo Surabaya-Indonezia inklui mos moras rins balun tanba medikus sira labele halo iha ne’e.
Alemde ne’e, nia afirma, halo mos referral ba pasiente ho idade labarik to’o ferik katuas sira ne’ebe sofre moras kurasaun no kankru atu halo kemoterapia, tanba iha ne’e seidauk bele halo.
“Iha Indonezia Ospital Sangla Bali iha pasiente nian 12 mak sei baixa hela, Surabaya iha Darmo no Sutomo kuaze pasiente hamutuk sanulu an resin,” Diretor da Costa dehan.
Nia hatutan, katak husi numeru ne’ebe iha pursentu 98 mak fila ho kondisaun diak iha pursentu rua mak la konsege salva sira nia vida.
