Vise Ministra Saude, Maria do Céu Sarmento Pina da Costa, hateten oras ne’e dadaun aimoruk kontainer hat mak tama ona iha armajen SAMES nian hein atu halo distribuisaun ba iha fasilidade saude sira iha teritorio tomak. 
Bazeia ba akordu ne’ebe governu Timor –Leste liu husi Ministerio Saude halao ho Kimia Farama iha fulan hirak liu ba oras ne’e dadaun sira hatama ona aimoruk prioridade ne’ebe presiza kuaze 50 % atu atende dadaun komunidade sira tanba iha stok aimoruk balun mak stok mamuk ona iha fasilidade saude.
Vise Céu rekonese, katak iha stok aimoruk balun mak mamuk duni iha failidade saude, maibe la signifika laiha liu tanba ne’e sira fo prioridade liu ba stok out sira atu bele hatama lalais hodi atende pasiente sira.
“Ami iha lista hau ladun fiksa, maibe ami husu kuaze 100 e tal items aimoruk maibe sira haruka uluk mais ou menus 50 Items aimoruk ho konsomaves (alat kesehatan) sira ne’e mak tama ona,” dehan Vice Céu.
Nia hatutan, stok aimoruk ne’ebe tama ona ne’e sei atende iha fulan hirak nia laran espera sei to’o iha fulan Dezembru nia laran, karik presiza tan aimoruk , Apotik Kimia Farm bele hatama tan ate fulan Maiu 2014.
Iha parte seluk, Diretor Klinika Ospital Nasional Guido Valdares (HNGV), Isidoro da Silva, hateten oras ne’e dadaun iha HNGV iha stok balun menus kuaze aimoruk tablet iha item lima ka neen hanesan injeksaun inklui aimoruk antibiotic balun.
“Maibe oras ne’e dadaun aimoruk tama ona iha SAMES kontainer hat tuir informasaun ne’ebe ita bo’ot sira fo sai hau hanoin stok aimoruk sei sufsiente,” Doutor da Silva dehan.
