Musika ho titlu “Martina” ne’ebe dadaun ne’e espaila iha komunidade nia le’et hamosu lamentasoens husi grupu feto sira ne’ebe durante luta ba direitu feto, tanba konsidera musika ne’e hatun dignidade feto Timor nian.
Jerente Advokasia no Komunikasaun organizasaun Forum Komunikasaun Feto Timor (FOKUPERS), Honoria Lopes, hateten linguajen ne’ebe uja iha musika ne’e trata feto at los.
Tuir nia, ida ne’e bele hamosu konflitu iha sosiedade nia le’et, tanba linguazen ne’ebe sira uja ne’e ladun diak.
“Ita gosta nia intonasia, maibe nia lia fuan ne’e la diak, tanba hatun dignidade feto Timor,” Jerente FOKUPERS, Honoria Lopes kestiona, iha Farol, Dili.
Entretantu Deputada Maria Angelica Rangel, hateten ida ne’e akontese, tanba seidauk iha lei ida kona ba ida ne’e.
Deputada ne’e dehan, oras ne’e dadaun iha musica barak mak komesa espaila iha komunidade nia le’et ho linguajen ne’ebe ladun diak hanesan musika ‘Martina’, trata at feto sira.
Tuir nia, Timor –Leste nudar nasaun foun, ida ne’e hanesan faze ida atu eduka no fo hanoin malu, katak ema iha direitu espresa sira nia sentimentu liu husi meus oioin, maibe tenke ho lia fuan kritiku ne’ebe diak.
“Ita seidauk iha lei ida atu regula buat sira ne’e, hau hanoin en jeral seidauk diskrimina feto, maibe ba oin tenke hadia,” Deputada Rangel deha, iha Parlamentu Nasional.
Tuir observasaun TDW iha Kongresu Nasional Feto ba da-hat, movimentu feto sira sentre triste no ejiji ba governu atu kria lei ida hodi regula servisu kantor/a sira, tanba iha musika Tetun barak mak ho sira nia lia fuan hatun dignidade feto.
Alem de ne’e, sira mos sente preokupa ho fotograpia sira ne’ebe motorista sira uja ba kareta transporte sira, tanba ladun diak ba sosiedade liu –liu labarik minoridade sira.
Ejijensia sira ne’e organizasaun feto sira mos integra iha plataforma asaun hodi fo ba governu atu toma atensaun ba hodi asegura igualidade jeneru iha rai laran.
Lamentasaun sira ne’e mosu relasiona ho musika tetun ne’ebe oras ne’e dadaun espaila ona iha sosiedade nia let ho titulu Martina, Borboleta kalan no seluk tan.
Enkuantu Deputada Rangel dehan, Parlamentu sei fo prioridade ba lei ne’ebe fo benefisiu ba povu tomak hanesan Lei Rai nian, maibe la taka dalan atu kria lei kona ba ida ne’e iha future.
“Buat sira hanesan ne’e to’o tempu ita sei hare,” Deputada ne’e katak.
