Rehabilisaun estrada ligasaun Malahara ba Tutuala, distritu Lautem agora dadaun paradu hela, tanba falta de orsamentu.
Sekretariu Estadu Obras Publiku (SEOP), Luis Vaz Rodrigues, hateten projetu rehabilitasaun estarada ligasaun Lospalos ba Tutuala ne’e Kompania Megal Group mak kaer, ho nia distansia kuaze kilometrus 10 husi Malahara ba Tutuala.
“Maibe sira iha difikuldade oituan kona ba osan nian, governu anterior fo ona kontratu ba sira, maibe la to’o no tenke iha adisional, tanba servisu ne’ebe agora ne’e bo’ot tebes,” SE Rodrigues dehan, iha Mandarin, Dili.
Nia hatutan, husi Ministeriu Obras Publiku (MOP) bolu ona konsultan Renal det hodi hare estrada ne’e, tanba area ne’eba iha paizajen furak sai area turismu nian.
Total orsamentu ba projetu ne’e hamutuk $20. 600 no projetu ne’e hahu halo iha tinan 2010.
“Ne’e duni hau sujere ba sira atu hato’o kazu ne’e ba iha Primeiru Ministru no agora dadaun sira sei diskuti hela atu bele aumenta tan orsamentu ba obra ne’e,” SE Rodrigues katak.
Iha parte seluk Deputadu Francisco Branco, hateten, ne’e la’os deit responsabilidade kompania nian, maibe mos governu nian.
“Tanba ne’e servisu uja kontratu, karik kontratu hotu maibe obra seidauk hotu entaun presiza prolonga tan tempu, no karik osan mak limitadu, govenu tenke kolabora ho komphania atu bele resolve,” Deputadu Branco dehan.
Iha lidun seluk komunidade Anita Soares, hateten rehabilitasaun Estrada la’o duni maibe kleur liu no govenru no kompania ne’ebe kaer projetu ne’e tenke responsabiliza.
