Primeiru Ministru, Kay Rala Xanana Gusmao husu ba foinsa’e jerasaun foun sira atu kreativu no inisiativa hodi dezenvolve nasaun Timor-Leste, tanba rai ida ne’e sosa ho ruin no ran.
Primeiru Ministru (PM) Gusmao, dehan tinan ida ne’e governu selebra loron istoriku ne’e ho simples deit atu ema hotu liu-liu jerasaun foun sira, bele halo reflesaun ba sira nia an hodi kontribui ba dezenvolvementu labele ejiji deit mak direitu haluhan tiha dever nudar sidadaun ida.
Tuir nia, jerasaun foun sira agora la hanesan sira uluk maske iha susar no terus nia laran sira hamutuk ho lian ida deit atu kontribui ba funu hodi hetan liverdade no agora sira la ejiji buat ida ba governu, tanba sira hadomi rai ida ne’e.
“Ohin selebrasaun simples ida ne’e atu fo hanoin ba komponente hotu –hotu atu antes hare ba direitu hare mos ba dever hanesan uluk ferik katuas sira hatudu ona la tauk la hakiduk ba susar no mate agora hetan ona liverdade,”dehan Xefe Governu iha nia diskursu iha selebrasaun loron konsulta popular ba dala XIV (30/08), iha Palacio Governu, Dili.
Nia hatutan, katak Timor ukun an ona, maibe Timor oan liu –liu joven sira la hadomi ona rai ida ne’e, tanba baruk ten, la bo’ok an hodi buka dalan kontribui ba harii estadu ida ne’e, maibe buka estraga malu, oho malu.
Xefe Governu ne’e mos promote, katak governu sei esforsu an atu halo buat hotu hodi responde ba problemas ne’ebe povu hasoru, tanba konstrusaun estadu ne’e foin tinan 11 governu labele halo buat hotu iha loron ida.
“Povu tomak ne’ebe hau respeita fila fati katak estadu sei halo buat hotu atu neineik fo resposta ba ita nia problemas,” PM Gusmao dehan.
Iha oportunidade ne’e mos nia husu ba komponente hotu atu antes halo analiza ba planu ruma tenke sente uluk nudar Timor oan labele sente fali hanesan husi nasaun seluk.
Iha parte seluk, Antonio Soares nudar jerasaun foun hafoin rona reflesaun ne’ebe dirije husi PM rasik hateten katak reflesaun sira ne’e importante tebes ba joven sira atu refleta an hodi buka dalan partisipa harii estadu ida ne’e tanba liverdade ne’e uluk sosa ho ran no ruin ne’ebe oras ne’e sei naklekar hela.
Nia hatutan katak ema ida –idak iha nia hanoin ne’ebe diferente balun halo ida ne’e balun halo seluk la signifika sira la hadomi Timor maibe situasaun mak hanesan ne’e presiza halo kapasitasaun tan atu aumenta ema nia kuinesementu no hadia ema nia mentalidade.
“Uluk sira fakar ran no ruin luta hodi hetan ukun rasik an agora nudar jerasaun foun tenke fakar kosar hodi harii ita nia rai, se la’os ita jerasaun foun, se tan,” nia enkoraja.
Iha fatin hanesan Mateus de Jesus sente orgulhu ho dezenvolvimentu ne’ebe Timor –Leste halao hela agora maske foin tinan 11 tanba dezenvolvimentu ne’e presiza tempu.
“Hau hanoin dezenvoliventu ne’ebe oras ne’e dadaun la’o iha Timor –Leste ne’e diferente bo’ot ho nasaun sira ne’ebe ukun an tinan atus ona,” nia katak.
