Membru Parlamentu Nasional, Deputadu Mateus de Jesus, hateten salariu minimu $115 ne’ebe governu determina ba trabalhador sira, la koresponde ho sira nia nesesidades ne’ebe iha, tanba folin sasan baziku kada loron sa’e.
Deputadu husi bankada Congresu Nasional Rekonstrusaun de Timor (CNRT) ne’e dehan, tuir observasaun ne’ebe sira iha nota katak, presu ba nesesidade baziku husi loron ba loron aumenta beibeik.
“Hau fiar katak osan 115 dolar ne’e la halo buat ida, sa’tan ita moris iha sidade Dili ne’e,” Deputadu de Jesus preokupa, iha Parlamentu Nasional.
Tuir nia, osan $115 ne’e, ba sira ne’ebe sei klosan bele sustenta sira nia moris, maibe ba sira ne’ebe forma uma kain ona, desaraska tebes.
Entretantu Diretor Jeral Sekretariu Estadu Formasaun Professional no Empregu (DJ-SEPFOPE), Jacinto Barros Gusmao dehan, tuir lei ne’ebe iha (Lei Salariu Minimu) ba trabalhador, katak kada tinan rua sei halo revizaun ba lei refere.
“Ami halo pesikiza lolos ne’e salariu minimu 170 maibe ami bagi fali UNTAET nian fo 85 dolar depois bagi fali 180 bagi 2 ne’e mak hetan 140,maibe ba to’o konselho ministru dehan fali tenki hare fali ba funsionariu sira level um ne’e mak ajusta fali ida ne’e mak sai 115 ne’e,”Baros esplika.
Diretor ne’e rekonese katak, salariu $115 ne’e la to’o duni, tanba nia rasik sente no hare. “Hau loron tolu han fos karon ida, tanba ami la’os ema oituan,entaun ami iha fulan ida fos karon 10,” DJ Gusmao dehan.
