Atu prevene kazu trafiku humanu iha rai laran, organizasaun Fundasaun Alola sosializa informasaun kona ba asuntu trafiku humanu ba joventude sira iha distritu Dili, tanba asuntu ne’e konsidera risku iha Timor-Leste.
Jerente Programa Adokasia Fundasaun Alola (FA), Maria Gorumali Barreto, hateten sira iha dever importante atu hasa’e konesementu joventude sira nian kona ba tipu trafiku humanu, no oinsa mak sir abele prevene an husi aktu ne’e.
Nia hateten, katak treinamentu ne’e importante tebes ba juventude sira liu –liu feto, tanba dala barak feto foinsa’e sira mak sempre sai vitima ba trafiku humanu.
“Ita koalia kona ba trafiku humanu dala barak feto foinsa’e sira mak sai vitima entau sira hanesan alvu importante ba fundasaun alola atu hafe informasaun,” Jerente Barreto dehan, iha Mascarenhas, Dili.
Jerente ne’e rekonese, katak iha duni kazu trafiku humanu iha Timor-Leste, maibe susar atu detekta lolos, tanba komunidade sira taka informasaun.
Iha fatin hanesan, Bernadete Caetano, nudar partisipante sente kontente no konsidera importante tebes ba sira atu kompriende didiak saida mak trafiku humanu.
“Hau fiar katak buat ne’ebe hau hetan laos hau deit mak hatene no aplika deit ba hau nia moris maibe nudar joventude ne’ebe diak buat ne’ebe hau hetan hau sei fahe ba sosiedade no aplika iha hau nia sosiedade laran,”Caetano katak.
Entretantu Ilario de Araújo Sarmento konkorda ho nia kolega katak treinamentu ne’e importante tebes no maneira treianemntu ne’ebe diak tebes fo oportunidade ba sira atu halo diskusaun no husu bainhira la komprende kontestu ruma.
“Ida ne’ebe ami komprende ami tau iha ami nai kakutak ida ne’ebe mak ami la komprende ami sei husu tan atu ami bele kuinese klean liu tan,” Sarmento dehan.
Nia husu ba organizasaun ne’e atu kontinua treinamentu sira hanesan ne’e atu bele hasae juventude sira nia kuinesementu ba area espesifiku sira hanesan ne’e tanba liu husi eskola no formasaun sira hanesan ne’e mak ema bele komprende diak liu tan.
Hatan ba kestaun ne’e Jerente Programa Advokasia, hateten katak treinamentu hanesan sira sei halao iha 13 distritus hodi habelar ba juventude sira iha nivel distritus sira.
Nia hatutan katak liu husi treinamentu ne’e sira aprende buat barak hanesan kontestu igualidade jeneru liu –liu fahe servisu uma laran, trafiku humanu no direitus humanus oinsa respeitu ema seluk nia direitu.
