Organizasaun non governmental Ba Futuru, ba tinan ida ne’e sira laiha programa treinamentu ba foinsa’e sira iha sukus, kona ba harii dame maibe sira focus ba iha eskola sekundaria sira ne’ebe sai risku ba konflitu.
Diretora NGO Ba Futuru, Joana da Cruz, hateten sira nia programa Peace Building hahu iha tinan 2006 bainhira iha IDP’s sira fo treinamentu harii dame, hanesan rezolusaun konflitu, analiza konflitu, prevene konflitu, rezolve konflitu la ho violensia ba joventude sira iha sukus ne’ebe risku ba konflitu hanesan Tasitolu, Bairo Pite, Becora inklui Comoro rasik no profesores no polisia nasional sira hamutuk nain 25.000.
“Agora dadaun ami nia projetu la halai liu ba joventude sira iha sukus, maibe ami focus liu ba iha eskola sekundaria sira,” Diretora da Cruz dehan, iha Dili.
Kona ba edukasaun dame, nia dehan bele fo, maibe la garantia tanba mudansa hahalok presiza tempu atu hadia no depende mos ba ema ida –idak atu maneija sira nia hirus.
Tuir nia, Eskola Sekundaria sira ne’ebe sai alvu ba programa ne’e, mak hanesan Eskola Sekundaria Nicolao Lobato, Rainha da Paz, Finantil, 10 de Dezembru tanba risku ba konflitu.
Entretantu foinsa’e suku Comoro, Martinho da Silva, konkorda ho hanoin organizasaun nian katak treinamentu bele fo regularmente ba joven sira iha suku, maibe depende ba ema ida-idak atu kontrola sira nia an tanba atu muda ema nia hahalok ne’e la’os fasil.
“Treinamentu bele halo maibe depende ba ema ida-idak atu kontrola sira nia an liu –liu foinsa’e sira,” foinsa’e da Silva tenik.
Tanba ne’e, nia husu ba autoridade local sira tenke halo kordenasaun ne’ebe diak ho polisia, nune’e bele halo atuasaun rapido foinsa’e, nakar sira ne’ebe gosta kria problema iha bairo laran tanba komunidade sira hakarak hela hakmatek.
Entretantu Xefe Suku Fatuhada, Marcelino Soares ne’ebe sai porta voz hodi prevene konflitu iha Dili laran (18 Julhu 2013), deklara katak nudar autoridade local, sira apoia tomak servisu polisia no forsa F-FDTL nian, halo atuasaun ba foinsa’e sira ne’ebe halo problema.
