Sekretariu Estadu Politika Formasaun Profesional e Empregu (SEPFOPE) fo sai ona estandarte salario minimu ho montante $1.15 ne’ebe empregado sira tenke selu ba trabalhador sira kada fulan maibe oras ne’e dadaun empregador sira selu trabalhadora domestika tuir sira nia hakarak.
Tuir Koordenador Advokasia organizasaun Working Women Centre (WWCTL), Helven Alberto Benio, katak governu tenke halo meus diak ida hodi kontrola empregador sira ne’ebe fo servisu ba trabalhador sira tantu individu ou publiku, tanba empregador barak mak bosok ten sira la implementa salario minimu maibe sira dehan implementa ona.
“Hau hanoin kona ba salario trabalhadora barak liu (maioria) mak simu $85.00 to’o $35.00 mai kraik,” Koordenador Helven, bainhira partisipa iha diskusaun planu estrategiku WWCTL nian, iha Salaun Canossa Balide, Dili.
Bazeia ba peskiza baziku ne’ebe WWCTL hala’o iha distritu Dili, Oe-Cuse, Baucau no distritu Ermera, hatudu katak maioria trabalhador domestika sira inklui mos hein loja, restorante no warung sira sei seidauk simu salariu ne’ebe governu define ona $1,15 kada fulan.
Nia hatutan, problema trabalhadora domestika ne’e komplikadu tebes tanba kuaze trabalhadora sira halao servisu la ho kontratu tanba ne’e sira sei esforsu hodi halo advokasia ba empregado sira hodi kumpri sira nia obrigasaun atu fo kontratu ba trabalhadora sira no selu tuir salariu ne’ebe determina ona.
Iha parte seluk, Diretor Geral SEPFOPE, Jacinto Barros Gusmão, konsidera problema trabalhadora domestika ne’e komplikadu tebes no susar atu kontrola maibe sira nafatin halo inspesaun bainhira hetan keixa ruma husi trabalhadora sira.
Tuir lolos , nia dehan, empregador sira ne’ebe selu trabalhador sira la tuir estandarte ne’e viola lei ne’ebe iha maibe situasaun mak hanesan ne’e trabalhadora sira simu servisu ne’ebe empregador sira fo ho salariu $50 – 80 nein ho kontratu tanba nesesidade.
“Ita nia trabalhadora balun susar atu kontrola tanba servisu laiha, entaun ema ruma mai lohi sira simu deit ona ne’e mak problema ne’ebe ita hasoru,” Diretor Geral SEPFOPE ne’e katak.
