Tuir observasaun Komisaun Nasional Direitu Labarik (KNDL), hatudu katak menu merenda eskolar oras ne’e dadaun la garantia nia nutrisaun ba labarik sira tanba labarik sira han deit koto, etu no naan lata sira.
Jose Coreia da Piedade, Teknika Profesional KNDL, konsidera politika Ministeriu Edukasaun (ME) nian liu –liu kona ba merenda eskolar ne’e atu atrai deit labarik sira labele abandona aulas, maibe la fo nutrisaun ne’ebe diak ba sira nia saude.
“Ministeriu Edukasaun nia politika primeiru mak dada labarik sira labele abandona aulas hare ba kualidade nutrisaun seidauk preense criteria ne’ebe iha,” Tekniku Piedade dehan, iha Dili.
Tanba ne’e, KNDL nafatin sujere no halo advokasia ba iha governu liu –liu ME atu hadia kondisoens konzineirus sira nian atu nune’e bele prepara aihan ne’ebe diak ba labarik sira han ho kontente labele moras tanba prepara ladun diak.
Iha parte seluk, Prezidente komisaun F (Saude, edukasaun, veteranus, Igualidade Jeneru), Virgilho Da Costa Hornai rekuinese katak programa merenda eskolar ne’ebe oras ne’e dadaun lao ne’e la fo duni nutrisaun ba labarik sira tanba koalia kona ba nutrisaun labarik sira tenke han naan, modo tahan, susu been, ikan no aifuan maibe realidade orsamentu kada labarik ida 15 centavus ne’e imposivel atu koalia nutrisaun.
“Provizoriamente nutrisaun ne’e laiha maibe hare ba ense aulan no labarik sira nia kabun ne’e iha maibe intermus nutrisaun ho 15 sentavus no maneiza mos ba kompania ne’ebe tein ne’e nia rukru ne’ e hau hanoin la korenponde ba estandarte menu,” dehan nia.
Nia hatutan katak oras ne’e dadaun Ministerio Edukasaun dezenvolve ona menu merenda ida diak mos maibe importante mak tenke hare fali ba orsamentu tanba ne’e sujere atu hasa’e orsamentu ba 25 sentavus kada estudantes hodi responde ba ejijensia menu ne’ebe iha.
Entretantu, estudantes Margarida Baptista hateten katak iha semana hirak ne’e iha eskola Ensino baziku Fatuhada programa merenda eskolar paradu ona tanba orsamentu laiha.
“Iha eskola ami lahan tiha ona lahatene tanba saida maibe ami husu ba tia sira tein ne’e dehan ba ami katak imi nia osan laiha,” dehan estudantes sestu ano ne’e.
Nia hatutan katak sira nia menu agora dadaun diak lahanesan uluk tanba sira agoara han mak etu maran ho modo koto, ikan latan (deho, sardin) inklui ayam potong no sosis.
