Komunidades iha kapital Dili husu ba Administrasaun Distritu Dili, atu halo operasaun ba animal sira ne’ebe mak kontinua la’o livre iha kapital laran.
Komunidade Kaikoli, Francisco Joao, hateten Dili hanesan kapital nasaun Timor-Leste nian, presiza fo imajen ne’ebe diak, moos no ema hotu ne’ebe hela Dili tenke hamoos nia ambiente rasik.
“Ita hare animal sira ne’e husik arbiru deit iha kapital laran, la’o ba mai deit no tee arbiru, hanesan ita hare iha area Kaikoli, Fatuhada, Kampu Alor tee nakonu, no ida ne’e ladiak ba ita nia saude,” komunidade Joao preokupa, iha Kaikkoli, Dili.
Alem de ne’e nia dehan, ho husik animal arbiru, bele fo impaktu mos ba iha movimentu motor no kareta iha Dili laran, tanba dalaruma korta fali Estrada no bele akontese asidente no ema bele monu.
Entretantu Deputadu Manuel da Costa Guterres, husu atu hare didiak ba kestaun ne’e, tanba vida komunidade sira nian la sees husi animal sira.
“Kultura ita nian mak obriga duni ita hakiak animal, maibe parte ida ita mos hakarak ita nia sidade sai sidade ne’ebe furak, livre husi animal,” Deputadu Guterres katak. Maske nune’e, nia parte konkorda atu governu halo operasaun animal sira ne’ebe husik arbiru deit iha sidade laran, sa’tan Dili hanesan capital nasaun, tenke moos.
“Ita ida be hakiak animal ne’e mak tenke kria kondisaun ba ita nia animal sira, la’os hatene hakiak deit depois husik livre iha sidade laran,” Deputadu Guterres dehan.
Tan ne’e nia sujere, ba iha komunidade sira ne’ebe hela kapital Dili hakiak animal tenke sulan tiha iha nia fatin, atu nune’e labele movimentu ba mai iha sidade laran.
Wainhira TDW tenta konfirma asuntu ne’e ba iha Administrador Distritu Dili, Gaspar Soares maibe nia rejeita fo komentariu ba asuntu ne’e.
