Koordenador Komisaun Nasional Peskiza no Elaborasaun Historia Mulher Timor –Leste, Nuno Rodrigues hateten, nia parte sei halo viajen ba Portugal hodi buka informasaun no dokumentus balun kona ba resistensia nian, tanba dokumentus iha museum seidauk kompletu.
Koordenador ne’ebe hakerek mos kapitulu ida kona ba feto iha kolonialismu iha livru ne’e, hateten, dokumentus ne’ebe iha Arkivu Museum Resistensia Timor-Leste (AMRTL) agora dadaun ne’e ladauk kompletu, liu-liu kona ba tempu kolonial nian.
Tanba ne’e nia hatutan, vizita ba Portugal ne’e importante tebes tanba iha titlu ida ne’e, fontes principal balun agora hela iha Portugal.
“Vizita Portugal ne’e la’os atu buka informasaun foun, maibe buka dadus balun ne’ebe hakerek nain sira presiza atu kompleta sira nia hakerek kada kapitulu, tanba dadus mak faktu importante ba historia ida,” Koordenador Komisaun Nasional Peskiza no Elaborasaun Historia Mulher Timor –Leste (KNPEHMTL), Rodrigues katak, iha Balide,Dili.
Koordenador Rodrigues afirma, hakerek nain sira iha ona infromasaun barak inklui dadus balun kona ba involvement feto iha ai laran maibe kona ba tempu colonial nian menus, hanesan feto relijioja, krese (oinsa hakiak labarik iha tempu kolonial) ne’e laiha liu.
Iha parte seluk, Vise Prezidente Grupu Feto Parlamentar (GMPTL), Deputada Albina Marçal, rekonese katak dokumentus barak mak laiha iha AMRTL, tanba durante funu libertasaun laiha Timor oan ida atu hakerek istoria ho lolos kona ba prosesu ne’e.
“Hau hanoin presiza duni buka tan fontes ne’ebe mak bele haforsa no kompleta liu tan kontiudu istoria ne’ebe sira atu hakerek,” apoia Deputada Marçal.
Deputada ne’e mos apresia ba servisu KNPEHMTL nian ne’ebe hahu hakerek kona ba istoria espesifiku kontribuiasaun feto iha luta ba libertasaun nasional iha pasadu.
Nia mos sujere ba, hakerek nain sira atu hakbesik an ba iha veteran sira,hodi buka tuir informasaun klaru, nune’e bele kompleta istoria ne’ebe iha ona.
Entretantu bainhira TDW koko konfirma kestaun ne’e ba iha Diretor Ezekutive AMRTL, Antoninho Baptista Alves, maibe la konsege tanba okupadu.
