“Inan aman bele fahe malu maibe responsabilidade ba oan kontinua, ezemplu oan hela ho inan nia kondisaun diak ka lae liu –liu nesesidade bazikus, se ladiak aman tenke kada fulan fo supporta aktividade oan nian,” dehan Juis Administrador Tribunal Distrital Dili, Duarte Tilman, (01/02), iha Colmera, Dili.
Nia rekonese katak, durante ne’e Tribunal Distrital Dili (TDD) hala’o julgamentu ba kazu labarik abandonadu sira, atu garante sira nia direitu hetan atensaun husi inan aman.
Tuir nia, prosesu atu garantia labarik sira nia direitu tenke liu husi Ministeriu Publiku tanba sira mak sei reprezenta labarik halo asaun obrigasaun komprimentus responsabel parentais hatama iha tribunal atu foti dezisaun obriga inan aman atu trata labarik ho diak tuir situasaun ekonomia ne’ebe sira iha.
Iha parte seluk, Reprezentante Komisaun Paz e Justisa Diocese Dili, Martina dos Santos katak peskiza ne’ebe sira hala’o iha tinan 2010 to’o 2012 iha distritu Dili deskobre katak labarik (1-18 anos) hamutuk 43 mak abandona husi inan aman tanba divorsiu.
Husi numeru ne’e kazu hamutuk 15 mak tama ona iha tribunal atu hala’o julgamentu hodi eziji sira nia dirietu tuir lei haruka.
“Kazu ne’ebe ami hetan aman nunka atu fo atensaun ba oan sira ezemplu kazu ne’ebe grave liu mak iha parte Lahane nian tanba oan primeiru aman rekonese, maibe oan segundu aman la rekonese no deside abandona sira hodi moris ho feto seluk,” dehan Reprezentante Komisaun Pas e Justisa Diocese Dili ne’e.
Nia dehan, dadus ne’ebe sira iha, agora dadaun levanta ona ba Ministeriu Publiku hodi halo prosesu investigasaun klean ba kazu ne’e.
