Tuir Diretora Jeral Ospital Nasional Guido Valadares (HNGV), Odete Viegas da Silva katak nudar ema ne’ebe tur iha kargu xefia, sira hatene prosesu ne’ebe iha, bainhira sira nia mandate hotu,Ministru Saude sei fo informasaun antes troka ho ema foun.
Nia dehan, antes mandate hotu, Komisaun Funsaun Publika sei haruka karta ida ba Ministeriu Saude no tenke publika iha Jornal da Republika.
“La’os hanesan sistema Ministru Saúde nian agora ba ho karta husi komisaun funsaun publika akompanha kedas ho ema foun ne’ebe atu troka,” lamenta Diretora Jeral HNGV, Odete Viegas da Silva, (11/02), iha Bidau, Dili.
Diretora ne’e mos eziji ona karta, se sira mai ho karta ofisial maske prosesu ne’e lalos maibe nia pronto husik kargu ne’e.
“Ami tenke husik kargu ida ne’e tanba ita moe no iha dignidade,” dehan Diretora da Silva.
Nia mos husu ba Ministru Saude, Sergio Lobo karik iha buat ruma la los tenke koalia “La’os atu hatun malu, buat lia los ita tenke koalia,”.
Nia hatutan, problema ospital kompleksu tebes tanba ne’e presiza ema ne’eben iha vontade atu servisu iha ekipa, se lae sei la hadia buat ida maibe buat barak mak faila tanba uza poder hodi troka ema arbiru deit.
Iha parte seluk, Membru Komisaun F, ne’ebe trata asuntu saúde, edukasaun, kultura, veteranus no igualidade jeneru, Deputadu Eladio Faculto hateten sistema asistensia saúde importante tebes tanba atendimentu publiku maibe atu sistema sira ne’e la’o ho efisensia no efikas tenke servisu iha ekipa laran no konsidera malu.
“Hau la hatene politika ministeriu saúde nian atu halo melhoramentu ba sistema ne’e oinsa maibe ita hein deit saida mak sei mosu,”Deputadu Faculto esperansa.
