“To’o ohin loron povu seidauk sente fornesementu bee moos, ne’e duni governu tenke esforsu an hadia sistema ne’ebe maka diak nune’e komunidade hotu bele asesu ba bee moos,” sujere Deputadu Leonel Marcal, (04/02), iha Parlamentu Nasional.
Deputadu ne’e husu atu governu liu husi Sekretariu Estadu kompetente halo sosializasaun ba komunidade sira atu sira labele koa kanu arbiru no kanu ne’ebe mak tuan tenke troka.
Nia mos husu ba komunidade sira atu labele koa no sobu kanu estraga tanba populasaun balun to’o agora seidauk asesu ba bee moos.
“Tanba iha fatin balun bee la tun loron ida ou rua sira sobu tiha kanu, ne’e ladiak, no husu mos ba governu troka kanu ne’ebe mak at ona, tanba ita hare balun ne’e iha kedas tempu Indonesia ne’e dalaruma at no intupidu tiha,” dehan Deputadu husi bankada Fretilin ne’e.
Hatan ba kestaun ne’e Sekretariu Estadu Agua Saneamentu e Urbanizasaun (SEAU), Elias Pereira Moniz dehan, agora dadaun nia parte prepara hela sistema lubuk ida no hein deit atu implementa.
“Ita hakarak liu –liu ba parte urbana hanesan iha Dili ne’e uma kain idak –idak bele hetan nia torneira ida, ho ninia kontadores kompleto atu nune bele hetan bee durante 24 oras,” dehan SE Perreira.
Maibe tuir nia antes ne’e sira sei halo uluk sosializasaun kona ba dekretu lei numeru 4/2004 no diploma ministerial numeru 8 ne’ebe koalia fornesementu bee moos ba komunidade sira nune’e sir abele iha konesementu kona ba lei hirak ne’e.
Tuir nia, depois de halo sosializasaun ba lei hirak ne’e, Governu komesa hadia kanu sira ne’ebe maka at, regula fila fali kanu ilegais sira, atu nune’e bee sira ne’e la’o duni tuir nia dalan.
“Tanba orsamtentu ne’ebe maka aloka ba ida ne’e hamutuk pur volta de 3,28 mill, ne’ebe iha posibilidade atu bele hadia kanu sira ne’e, ” dehan SE Moniz.
Nia garante katak iha tinan 2013 ne’e komunidade sira iha capital Dili bele hetan hotu bee moos.
