Primeiru Ministru, Xanana Gusmao dehan governu preve ona orsamentu $9.1 milioens hodi halo konstrusaun ba embaixada rua iha nasaun sira ne’e inklui loke Ajente Konsuladu iha Atambua, Indonezia.
“Timor-Leste lokalizadu kedas iha regiaun ida ne’ebe estrategiamente previliziada, ne’e duni tinan ida ne’e ita presiza harii embaixada rua iha nasaun rua hanesan Nova Zelandia no Reino Unido iha Englatera no ajenti konsultan iha Atambua,” dehan Primeiru Ministru, Gusmao, (04/02), iha PN.
Entretantu Deputadu Estanislao da Silva hateten, karik Governu hanoin ne’e importante duni atu harii Embaixada iha nasaun rua ne’e.
“Hau la hatene tansa maka Governu presiza atu harii embaixada iha ne’eba, hau hanoin tenke iha justifikasaun ruma karik, hau la kontra maibe ita iha embaixada iha Australia ne’ebe ke fo mos kobertura ba Nova Zelandia, maibe ita presiza hatene mos husi governu tanba saida maka ita presiza tau tan embaixada iha Nova Zelandia,” Deputadu ne’e katak.
Iha sorin seluk tuir Vise Ministru Negosiu Estrangeiru, Constancio da Conceicao katak, nesesariu duni atu loke embaixada iha nasaun rua ne’e.
“Rai rua ne’e fo apoiu ba ita maka’as iha area barak, iha dezenvolvementu tanba ne’e maka ita presiza loke embaixada iha ne’eba,” dehan Vise Ministru ne’e.
Nia informa, nasaun Reinu Unido sira nia kontribuisaun agora maka G7+, no alem de ne’e iha ne’eba komunidade Timor-Leste mos barak.
“Atu nune’e ho emabaza iha ne’eba, sira bele hare mos ita nia komonidade sira nebe maka hela iha ne’eba, no ita presiza loke mos ajenti konsultan iha Atambua para atu nune’e sira bele fo atendementu ba ita nia timor oan ne’ebe maka hela iha ne’eba mos,” dehan Vise Ministru Negosiu Estrangieru ne’e.
