Diresaun Nasional Transporte e Terestres (DNTT) sei muda Terminal Tasi tolu ba iha Tibar, tanba terminal tuan governu entrega ona ba iha Forsa Defeza Timor-Leste (F-FDTL).
“Ami nia Xefe Trafiku sira ba hare ona lokasi iha Tibar atu halo fali Terminal foun,” hateten Staf Senior Trafiku Rodaviaria, Abel Conceicao, iha Balide, Dili.
Entretantu Membru Parlamentu Nasional, Deputadu Arao Noe katak, kestaun muda terminal laiha problema importante mak tenke iha terminal foun ba pasejeirus sira.
“Prioridade nafatin halo terminal foun, nune’e bele konsentra hodi transportes publiku sira ne’ebe mai husi distritu bele dekarega pasajeirus iha fatin ida,” dehan Deputadu Noe.
Terminal Tasi-toludsde ukun okupa husi Forsa Stabilidade Internasional (FSI) Australia maibe tinan kotuk sira entrega tiha ba Governu no Governu entrega fali fatin ne’e ba Forsa F-FDTL.
Iha parte seluk Komunidade ka pasajeirus balun husi Maliana ne’ebe hein hela bis iha terminal tasi tolu, lamenta tanba konsidera fatin ne’e do’ok liu no tenke hasai osan barak tan ba selu taxi.
“Iha terminal tuan ne’e deit mos taxista sira husu tiga dollar ba deit iha Pantai Kelapa, ne’e ezemplu, sa’tan tau kedas iha Tibar, ne’e do’ok liu no fo benefisiu ba taxista sira,” lamenta Pasajeiru ne’ebe lakohi publika nia identidade ne’e.
Tanba ne’e nia husu ba Governu liu-liu DNTT atu tetu didiak hanoin no planu ida ne’e, nune’e bele mos fo benefisiu ba pasajeiru sira.
