Atu hanoin hikas Dom Boa Ventura nia funu no mate hodi liberta povu husi okupante estranjeiru iha tinan 100 liu ba, oras ne’e dadaun Governu liu husi Ministeriu Administrasaun Estatal (MAE) prepara ona selebrasaun loron 100 ba Dom Boa Ventura nia mate hodi kria Komisaun Organizadora ba eventu ne’e.
“Hau hasoru malu tiha ona ho Primeiru Ministru e nia fo ona orientasaun kona ba planu formasaun Komisaun Organizadora, preparasaun maske tempu semo maibe ami fiar semana oin ne’e komisaun ita hari no bele servisu ona tanba distansia husi Dili ba Same do’ok oituan, problema movimentasaun logistic susar oituan,” hateten Ministru Jorge da Conceicao Teme, foin lalais, iha Dili.
Komisaun Organizadora ne’ebe xefia husi MAE ne’e kompostu husi Ministeriu Negosiu Estranjeiru, Ministeriu Turismu no Kultura, Ministeriu Saude, Ministeriu Komersiu Industria no Ambiente, Ministeriu Obras Publika, Instituisaun Polisia Nasional Timor-Leste, Forsa Defeza Timor-Leste inklui mos Agensia Dezenvolvimentu Nasional.
Tuir nia, oras ne’e dadaun povu hein hela komemorasaun loron importante ne’e no sai loron festeja povu nian hodi fo rekonesementu formal ba heroi sira.
“Uluk okupasaun estranjeira mai fahe ita Timor maibe ikus funu Manufahi ne’ebe lidera husi Dom Boa Ventura halibur ema hamutuk hodi halo forsa para halo revolta kontra okupasaun estranjeira,” dehan Ministru Teme.
Ministru Teme afirma, iha dia 28 Novembru tinan ne’e sei halo festa rekonsialiasaun nasional, tanba maske hetan ona independensia maibe Timor oan sei fahe malu tanba ne’e “ita aproveita momentu ida ne’e para sai momentu ne’ebe ke ita hamutuk sai unidus,” Ministru esperansa.
“Espiritu Dom Boa Ventura nian ita senti katak,Dom Boaventura mak sai hanesan matadalan ba ita nia unidade nasional, jerasaun foun tenser banati tuir saida mak Dom Boa Ventura halo tinan 100 liu ba hodi halibur forsa para kontra okupasaun estranjeira.”
Iha sorin seluk Deputadu Francisco Branco duvida ho selebrasaun loron importante ne’e tanba to’o agora governu seidauk iha preparasaun ne’ebe konkretu.
“Hau sei duvida hela, falta deit fulan ida ita atu komemora eventu bo’ot ida ne’e maibe preparasaun seidauk iha,” Deputadu Branco pesimista.
Enkuantu orsamentu husi Orsamentu Jeral Estadu 2012 ne’ebe aloka ba eventu ne’e iha deit $6 miliaun.
Komemorasaun falta deit fulan ida maibe to’o agora estrada diresaun ba iha Same nian seidauk diak.
“Hau la hatene konvidadu sira sei ba partisipa ne’e la’o oinsa,” Deputadu Inacio Moreira preokupa.
