Banku de Sangue Nasional (BSN) sei hato’o pedidu ba Universidade Nasional Timor Lorosa’e (UNTL) no Universidade Dili (UNDIL), atu nune’e sira bele halo doasaun ran hodi ajuda pasiente sira ne’ebe presiza ran tanba agora dadaun stok ran iha deit 15 (15 bungkus).
“Ami sei halo pedidu ida direita ba sira nia diresaun hodi bele hetan resposta ne’ebe diak atu bele halo doasaun iha sira nia universidade, bele ajuda pasiente sira ne’ebe presiza tanba agora dadaun nesesidade transfusaun ne’e as,” dehan Xefe Unidade BSN, Arsenio Jose, iha Bidau Toko Baru, Dili.
Enkuantu rezultadu doasaun ran husi funsiunariu Sekretariu Estadu Joventude no Desportu (SEJD) ne’ebe ekipa BSN rekolha foin lalais ne’e hamutuk 36 pakotes.
Nia hatutan, bainhira hala’o teste grupu ran no serologia teste hodi detektak moras infeksaun hanesan (HIV/SIDA, Sipilis, Hepatitis) pakote ne’en (6) identifika ho moras infeksaun, enkuantu pakote 30 mak bele utiliza tanba livre husi moras infeksaun.
Entretantu Prezidente Komisaun F Parlamentar, Deputadu Virgilio da Costa Hornai sujere ba BSN atu halo sosializasaun ba Institusaun ka Diresaun kona ba vantajen no desvantajen bainhira halo doasaun ran tanba ema barak sei falta informasaun ba asuntu ida ne’e.
“Hau hanoin atendimentu BSN ladun masimu tanba ne’e Ministeriu Saúde buka atu melhora tan ninia an hodi fo atendimentu ne’ebe diak liu tan ba povu Timor-Leste ne’ebe presiza,” sujere Prezidente Komisaun F ne’e.
Tanba ne’e Deputadu ne’e dehan, ba III lejislatura ne’e Komisaun F sei fokus ba orsamentu Jeral do Estadu ne’ebe sei aloka ba setor saúde no edukasaun tanba setor rua ne’e importante tebes ba nasaun ida ne’e “koalia kona ba saúde salva ema nia vida, no edukasaun forma rekursu umanu,” Deputadu ne’e tenik.
