“Ami hala’o hela monitorizasaun buat hotu la’o diak laiha problema ida so iha violasaun ba visa turista nafatin iha tanba ema nia intensaun atu halao violasaun ba vistu trabalho, lei ne’e sempre iha importante ita esforsu atu kontrolu la’o nafatin hetan violasaun foti medidas tuir lei ne’ebe iha,” dehan Inspetor Jeral do Trabalhu, Aniceto Leto Soro, (15/08), iha nia knar fatin Kaikoli, Dili.
Tuir nia, dalabarak trabalhadores sira servisu la uza vistu trabalhu husi SEFOPE nian maibe uza fali vistu turista nian, mas ami sempre fo sansaun hanesan multa husi empregador no trabalhadores sira tuir lei haruka,”.
Kona ba total trabalhadores estranjeiru ne’ebe servisu iha rai laran ho vistu turista, Inspetor Jeral ne’e dehan, sira la hatene klaru tanba la rejistu, maibe sira hetan husi kompania sira loron ida iha nain ida to’o tolu mak servisu ho vistu turista.
Nia esplika, SEFOPE fo vistu trabalhu ba trabalhadores estranjeirus iha faze rua, hanesan iha tinan 2004 regula bazeia ba dekretu lei 2004 nian, katak fo ba ema sira ne’ebe hela ona iha rai laran husi tinan 1999 ne’e kualker hetan hotu vistu, hanesan iha Kampun Alor la hare ba nivel kapasidade, maibe depois de tinan 2007 SEFOPE kria politika ida vistu trabalhu la fo ona ba kualker trabalhadores maibe ba espesialista ba tekniku hodi transfer kapasidade ba Timor oan sira.
Iha parte seluk Membru Parlamentu Nasional, Deputada Jacinta Perreira Abucaudehan, atu garantia trabalhadores estranjeirus sira labele uza vistu turista hala’o servisu iha rai laran, setor privadu sira tenke kopera ho governu atu halo kontrola ba kompania sira iha rai laran.
“Hau rasik mos dala ruma foti iha forum maibe governu mak laiha kontinuasaun ba sistema kontrolu ba vistu trabalhu sira ne’e, tanba ita hare trabalhadores estranjeirus sira iha ne’e la’os sira ne’ebe espesifiku maibe maioria sira ne’ebe hala’o servisu ne’ebe Timor oan mos bele halo, ne’e problema ida ne’ebe governu presiza tau atensaun,” dehan Deputada Abucau.
