Tuir Xefe Aldea Kai-casa, Inosencio Hornai, katak agrikultor sira la uza bee husi irigasaun tanba irigasaun ne’e rasik aat desde 2009 tanba mota sobu, e to’o ohin loron seidauk hadia.
“Sira iha loron 3 fulan Junu sira mai hare tiha ona atu hadia irigasaun ne’e maibe to’o agora la realiza buat ida,” hateten Xefe Aldeia Inosencio Hornai, (31/07), iha Kai-casa, Distritu Manufahi.
Xefe Aldeia ne’e informa, natar agrikultor sira iha suku ne’e hamutuk 67 hektares maibe halo deit hektares hitu (7) tanba irigasaun aat.
“Produsaun ba tinan ida ne’e la iha total kedas ne’ebe agora populasaun sira halai hotu ba iha rai matak hodi kuda batar para tahan ba tinan ida ne’e ninian,” dehan Xefe Aldeia ne’e.
Entertantu Xefe Suku Kai-casa, Henrique Antonio de Jesus katak, Ministeriu Agrikultura e Peska (MAP) servisu hamutuk ho Programa Dezenvolvementu Rural (RDP3) promete ona atu hadia irigasaun ne’e iha 2011 maibe to’o ohin loron la realiza.
“Husi diresaun Agrikultura nian mai fo hatene katak,irigasaun ne’e atu jadi iha fatin lima mais ate a data la realiza e tinan ida ne’e komunidade sira natar laiha produsaun tanba bee labele tama ba iha natar laran,” dehan Xefe Suku de Jesus.
Enkuantu Estensionista Abilio Maria Madeira, ne’ebe hala’o knar iha fatin ne’eba hateten,irigasaun aat iha tinan 2009, e desde ida ne’e agrikultor sira iha fatin ne’e halo natar uza udan been deit.
“Kuandu udan been laiha sira la halo natar ida,” hateten Estensionista Madeira.
Problema ne’e rasik hato’o ona ba iha Ministeriu Agrikultura iha Nasional maibe laiha respota to’o ohin loron.
“Hau tenta nafatin oinsa ami nia divizaun servisu hamutuk ho RDP3, ami planu atu halo maibe to’o agora ami seidauk bele halo,” Estensionista ne’e tenik.
