Iha semana oin Ministeriu Saude (MS) sei halo distribuisaun ekipamentus Mediku hamutuk container 15 ba Ospital Referal no Sentru Saude (SS) hotu iha teritoriu tomak, nune’e bele fasilita pesoal saude sira bele fo asistensia ba komunidade sira ho diak liu tan.
“Orsamentu distribuisaun sai ona entaun semana oin ami hahu halo ona distribuisaun ekipamentus sira ne’e ba iha distritus no sei distribui tan ba sentru saúde sira ne’ebe presiza ekipamentus medikus nian,” dehan Diretor Nasional Administrasaun Logistica e Aprovizionamentu, Ministerio Saude (MS), Leão Borges, foin lalais iha Kaikoli, Dili.
Ekipamentus hirak ne’e mak hanesan daun, luvas, no seluk tan sira ne’e to’o iha Timor iha fulan Julhu nia laran tanba tender ba hola ekipamentus sira ne’e tender internasional ,entaun kompania internasional ida husi nasaun India mak manan tender ne’e.
Tuir nia, ekipamentu hirak ne’e agora sei iha container laran, tanba orsamentu ba distribuisaunseidauk sai e kada loroin MS tenke selu $25,00 ba kada container.
Iha parte seluk tuir Administrador Ospital Nasional Guido Valadares, Rui Gago Exposto Manuel hateten HNGV seidauk simu ekipamentus medikus husi MS maibe iha semana ida kotuk sira hetan apoiu fasilidade iha sala pedeatria hanesan, makina halo manas bebe husi doadores sira, husi ministerio seidauk karik semana ida ne’e.
“Ospital Nasional mos sei hetan ekipamentus balun husi ekipamentus sira ne’e maibe barak liu sira halo distribuisaun ba sentru saúde sira hotu iha teritorio tomak tanba ita hatenen katak sentru saúde iha Timor laran falta tebes eqipamentus importante tebes,” dehan Administrador Exposto.
