“Hau hanoin tinan 10 ona hau kontribui ba dezenvolvimentu rai ida ne’e nian, tanba ne’e hau hanoin sai husi Parlamentu hau deskansa tinan ida nia laran, depois hau kontinua estudus ba oin hodi prepara an ba oportunidade seluk ne’ebe mai,” dehan Eis Vise PN, Deputada Maria Paixão, (30/07), iha Uma Fukun, Dili.
Maske tinan sanulu sai Deputada iha Uma Fukun no sai Administradora Distritu Aileu, maibe tuir nia, ida ne’e sufsiente ba nia, e iha buat barak mak presiza atu aprende liu tan ho diak.
Tuir nia, domina lingua importante tebes, liu-liu bainhira halo vizita ba rai liur.
“Dala barak hau infrenta hanesan vizita ba liur iha diskursu ne’ebe hau halo, estudu komparativu ne’ebe hau halo, hau presiza tebes lingua Ingles atu kompriende, buat barak mak hau hakarak tebes atu hatene, ne’ebe agora oportunidade diak ba hau atu prepara an, hodi nune’e bainhira hetan fali oportunidade foun bele kompleta ho frakeza no dificuldade ne’ebe hau iha agora,” Eis Vise PN Paixão tenik.
Nia esperansa katak, Membru Parlamentu foun sira bele kontinua hikas servisu ne’ebe sira husik hela, importante tebes sira tenke hetan treinamentu barak hanesan mos eis membru parlamentu sira iha durante ne’eba hodi bele servisu servi povu ho didikasaun, vontade diak ba nasaun ida ne’e.
Diferente ho Paixao, Deputada Gertrudes Monis husi Partidu Demokratiku (PD) maske nia naran la tama iha lista kandidatura ba terseira lejislatura, maibe nia rasik seidauk iha planu hafoin katik iha PN atu halo saida.
“Hau foin sai dadauk ne’e ne’ebe hau seidauk iha planu klaru,” dehan Deputada Monis.
