Durante tinan lima nia laran luta hodi promove igualidade jeneru,no atu haforsa liu tan Sekretaria Estadu Promosaun Igualidade (SEPI) fo ona oportunidade ba ema nain rua atu hala’o estudu iha liur (Indonesia) hasai mestradu kona ba Administrasaun Publiku no Jeneru nian, ho durasaun tinan rua.
“Ami halo ona akordu ho Universidade Gajah Mada Yogyakarta-Indonezia no ami haruka ona ema nain rua (2) feto ida mane ida, sira hala’o ona sira nia estudu tinan ida ona foti mestradu inklui mos kapasitasaun institusional, agora dadaun liu husi kapital dezenvolvimentu umanu hau nia funsionariu kuaze maioria sai atu tuir formasaun iha rai liur no rai laran,” dehan SE Idelta Maria Rodrigues, (26/07) iha Dili.
Tuir nia, durante SEPI hasoru difikuldade kona ba rekursu umanu iha area jeneru no adminisrasaun publika, e espera katak ba future “ita iha peritu rasik iha area rua ne’e, no la presiza ona importa ema husi liur,” Sekretaria EStadu esperansa.
Alende ne’e SEPI mos fo kapasitasaun Institusional direitamente ba Funsionarius internal rasik kona ba jeneru nian.
Entretantu tuir Diretora Organizasaun Feto Ki’ik Servisu Hamutuk (FKSH),Gisela de Carvalho katak, SEPI haruka tan ema nain rua ba hasai mestradu iha Indonezia ne’e esforsu ne’ebe positive tebes.
“Hau hanoin SEPI hetan rekursu finanseiru ne’ebe bele aumenta tan volume ba hala’o estudu iha liur, hasae tan sira nia kapasidade ne’e diak liu tan, tanba ita hare ba rekursu ne’e nain rua deit seidauk to’o atu atinji ita nia mehi no vizaun kona ba iqualidade generu,” dehan Diretora FKSH ne’e.
