Faluk no Oan Kiak (FOK) husi Falintil sira husu ba Partidus Politiku (ParPol) sira atu respeita konfiansa ne’ebe povu fo iha eleisaun Parlamentar ninian, no la’os hamonu fali konfiansa ne’ebe iha.“Hatudu imi nia maturidade politika liu husi atitudi no liafuan, atu nune’e bele hametin nafatin povu nia fiar ba imi,” sujere Porta Voz FOK- Falintil, Ivana Belo, (20/06), iha Sede Veteranus Taibesi, Dili.
Porta Voz FOK-Falintil ne’e mos husu ba Prezidenti da Republika atu uza kompetensia Konstitusional hodi husu ba lider politiku 1975 nian no lider rejistensia nian, liu-liu Partidu mais votadu iha eleisaun Parlamentar hanesan,Partidu CNRT,Fretilin,PD,Frente Mudansa atu hamosu consensus nasional hodi responde nesesidade nasional nian.
Husu mos ba Komandante Jeral Polisia Nasional Timor-Leste (PNTL, atu responsabiliza ba nia membrus ne’ebe tiru mate estudante ida iha Hera, hafoin konferensia partidu CNRT nian.
“Husu ba jerasaun foun no tuan sira atu rona malu no respeita malu liu-liu jerasaun foun sira atu respeita nia lider historiku sira ne’ebe sei moris no respeita historia luta libertasaun nian,” Porta Voz Belo apela.
Entretantu Deputada husi Partidu CNRT, Virgina Ana Belo dehan, kona ba situasaun paska konferensia sira nia partidu ne’e, Prezidenti Partidu klarifika tiha ona.
“Ami nia prezidenti partidu koalia tiha ona, ne’ebe ami la iha komentariu ba ida ne’e,” dehan Deputada ne’e.
