Lampu iha Palasiu Governu oin la funsiona durante tinan ida ona maibe Governu nunka tau matan atu hadia lampu sira ne’e.
“Ami kalan fa’an iha ne’e maibe ahi la lakan,” hateten Negosiante Agrifina Soares iha Palsiu Governu oin.
Tuir nia, Palasiu Governu bainhira iha tempu kalan hare hanesan iha aituan laran, tanba impaktu husi lampu la funsiona.
Preokupasaun hanesan mai mos husi Negosiante Roda tolu, Eldito Gusmao ne’ebe lor-loron fa;an iha area ne’e, katak lampu iha ne’e lalakan durante tinan ida ona.
“Ami mak fa’an iha ne’e to’o kalan maibe ahi ne’e la lakan tanba lampu sira ne’e kala kotu hotu tiha ona,”dehan Negosiante Gusmao.
Entertantu tuir Deputadu Joaquin Amaral katak, osan barak mak governu fakar ona problema ahi nian, maibe realidade to’o agora seidauk rezolvidu.
“Kapasidade ne’ebe ita monta ne’e bo’ot liu ba dala hat dala lima ne’ebe ita presiza,” dehan Deputadu husi Bankada Fretilin ne’e.
Nia hateten, problema sira ne’e atu rezolve ho osan deit osan la to’o presiza prosedimentu tekniku ne’ebe mak iha.
“Pur ezemplu 24 mega watt iha Comoro ne’e foun la uja,uluk ami kestiona hatama proposta atu koa tiha ho razaun dehan ne’e stand by para sekarik ida iha Hera problema ruma nia bele back up bele fun siona,” Deputadu Amaral preokupa.
Problema nebe tuir mai mak iha lina eletrika mak tuan liu ona no mos fulan rua ba kotuk muda airin eletrisidade muda mak implika fali ba iha ligasaun sira ne’e.
“Tanba ne’e mak hau hanoin katak, Governu tenke halo estudu ida ne’ebe integradu liu-liu ba planu urbanizasaun oinsa mak fiu sira ne’e halai tuir nia fatin,” Deputadu ne’e katak.
