Polisia Nasional Timor-Leste (PNTL) no Forsa Defeza Nasional Timor-Leste (F-FDTL) sir abele involve sira nia espouza ba iha atividade ruma ne’ebe bele kontribui ba
dezenvolvementu nasional iha pais ida ne’e maske seidauk iha baze legal ida.
Tuir Deputada Jacinta Pereira, la presiza kria lei ida kona ba ida ne’e, tanba partisipasaun feto iha area hotu-hotu hatur ona iha Konstituisaun artigu 17.
“Institusaun ne’e maka tenke kria atividade hodi bele involve sira nia espouza sira ne’e, atu nune’e ema bele hatene Komandante no membru sira seluk nia espouza ,liu-liu sesame istri polisia ka FDTL, atu nune’e sira mos bele fo sira kontribuisaun ba dezenvolvementu nasaun ida ne’e,” sujere Deputada ne’e, (20/07), iha Uma Fukun, Dili.
Tuir nia, Timor-Leste presiza foti esperiensia diak no positivu husi nasaun vizinhu Indonezia, iha ne’ebe espouza husi militar sira halo sira nia atividade rasik.
Entretantu tuir Kordenador Peskizador Fundasaun Mahein (FM), Joao Almeida Fernandes katak, seidauk iha baze legal ida mak regula kona ba atividade espouza husi Polisia no Forsa Defeza, maibe la taka dalan ba sira atu halo atividade ruma.
“Ita bele inclui espoza husi PNTL no F-FDTL sira atu karik iha atividade ruma bele involve mos espoza husi PNTL no F-FDTL, maibe tanba agora seidauk iha lei ruma,karik iha future bele,” hateten Kordenador ne’e.
Tanba ne’e tuir nia, planu ba oin Parlamentu foun tenke kria lei ida, atu bele hare mos ba kondisaun ida ne’e.
