Orsamentu Jeral du Estadu (OJE) 2012 ba Parlamentu Nasional (PN) nian sei sosa fasilidade foun ba Deputadu terseira lejislatura nian, nune’e bele fasilita sira nia servisu ho diak liu tan.
“Ami aloka osan ba kareta 65 ba prosima deputadus ninian, aloka mos orsamentu ba ekipamentu futuru deputadu presiza pur ezemplu hanesan laptop,” hateten Deputadu Aderito Hugo, iha Uma Fukun, Dili.
Tuir nia, sosa fasilidade foun deputadus foun sira hanesan obrigatoriu Parlalmentu nian, tanba iha mandatu deputadu tuan nian mos sosa kareta no laptop foun. “Tenke halo tratamentu hanesan,”.
Kona ba kareta 40 resin no laptop ne’ebe Deputadu segundu lejislatura uza, ne’e propriedade parlamentu nian no bainhira remata mandatu, deputadu sira tenke entrega fali ba PN.
Entretantu Deputadu Domingos Sarmento husi Bankada Fretilin dehan,tuir regra ne’ebe mak iha sasan estadu tenke fo fila ba estadu bainhira mandatu remata.
“Tuir lei tenke fo fila fali ba estadu, depois estadu hare katak buat ne’e sei uza ka la uza, se sei uja entaun hela ba utilidade publika,” Deputadu Sarmento dehan.
Deputadu ne’e mos sujere, kuandu PN la uza ona sasan sira ne’e, diak liu mak halo lelaun (lelang) ba publiku, nune’e osan sira ne’e bele tama fali ba kofre estadu nian.
“Hau hanoin diak liu tanto laptop ka kareta sira Parlamentu nian tenke tama hotu ba lelaun,” Deputadu ne’e sujere.
Iha fatin hanesan Prezidenti PN, Fernando Lasama de Araujo hateten, laptop sira deputadu sigunda lejislatura uja tinan lima ona tanba ne’e presija aloka orsamentu Jeral do Estadu presija sosa fali foun hodi entrega ba deputadu terseira lejislatura ninian.
“Orsamentu 2012 ninian ita aloka kedan osan para hola Laptop foun ba deputadu foun sira ba Cinco Anos ninian,” katak Prezidente PN, Lasama.
