Irigasaun Bobe-Leoriti iha Distritu Aileu ne’ebe rehabilita iha 2007 husi Diresaun Nasional Irigasaun (DNI), maibe agora la funsiona, tanba ne’e parte DNI koko atu hadia hikas irigasaun ne’e.
“Ami nia ema iha distritu atu hare kona ba kestaun ne’e iha, ami sei tenta kontaktu ba sira iha ne’eba atu oinsa para bele foti desizaun hodi hadia fali,” dehan Diretor Nasional Irigasaun, Martinho Pereira, (13/07), iha Comoro, Dili.
Tuir Diretor ne’e, irigasaun ne’e bebeik ona halo rehabilitasaun, maibe at fali tanba mota sobu tiha.
Entretantu Deputadu Aderito Hugo, dehan wainhira aprova orsamentu konaba irigasaun hirak ne’e iha mos osan ba manutensaun.
“Orsamentu atu rehabilita irigasaun sira ne’e, akompanha mos osan atu halo manutensaun, ne’e duni agora kona ba irigasaun sira ne’ebe maka la funsiona ne’e governu tenke uza osan manutensaun atu ativa fila fali irigasaun ne’e,” dehan Deputadu Hugo.
Tuir nia, fiar katak governu sei tau matan ba kestaun ne’e, tanba irigasaun importante tebes ba agrikultor sira.
