“Razaun hili PD ho Frente Mudansa hodi forma kintu governu tanba partidu rua ne’e la’o hamutuk tiha ona iha Kuatro Governu Konstitusional, sira nia lealdade ba ita nia maun bo’ot. Kay Rala Xanana Gusmao hanesan figura rezistensia nian ne’ebe ke promove unidade nasional,” hateten Deputadu CNRT, Pedro Martires da Costa, (16/07), iha Uma Fukun, Dili.
Alende partidu rua ne’e hatudu loyalidade ba figura Xanana Gusmao, sira mos rekonese sira nia sala ne’ebe sira halo durante tinan lima nia laran hamutuk ho CNRT iha Kuatru Governu Konstitusional.
Desizaun ne’e foti liu husi konferensia kuadrus partidu nian, ne’ebe partisipa husi Kordenador partidu CNRT iha 13 Distritus no militantes sira, ne’ebe hala’o iha Sala Sentru Konvensaun Dili (DCC).
Kona ba tanba sa mak CNRT la halo koligasaun ho Partidu historiku FRETILIN, Deputadu ne’e dehan tanba durante iha tempu kampanha linguajen ne’ebe fo sai husi lideransa Fretilin nian afeta los ba militants CNRT nia fuan.
Entretantu lideransa husi Partidu Demokratiku (PD) foti ona desizaun e sira simu koligasaun ho partidu CNRT no Frente Mudansa hodi forma Kintu Governu Konstitusional.
Tuir Deputadu Partidu PD, Adriano Joao hateten, PD ho nia estrutura tomak foti desizaun ne’e liu husi kongresu ne’ebe hala’o iha Salaun Formasaun Joao Paulo II, Comoro, Dili.
“Partidu Demokratiku foti ona desizaun katak atu koligasaun ho partidu CNRT ho Frente Mudansa, hodi ukun tinan lima oin mai,” hateten Deputadu ne’e.
Maske nune’e tuir Deputadu ne’e, to’o agora parte rua ne’e seidauk halo kontaktu ofisial kona ba asuntu ne’e.
