“Ema barak sai pengangguran tanba la asesu informasaun, la asesu informasaun laos sira nia sala, maibe tanba informasaun sira ne’ebe maka iha ne’e la hakerek ho lian sira nebe maka sira kompriende, barak liu ho lingua Portuges ne’ebe ema lahatene,” dehan Diretor Ezekutivu Fundasaun Mahein (FM), Nelson Belo, iha Balide, Dili.
Tuir Diretor Belo, livrus hotu-hotu hakerek ho lian Portugues e ema barak mak lahatene no kompriende lian ne’e, tanba ne’e diak liu governu prepara mos ho versaun Tetun.
Entertantu Deputadu Joaquin Amaral, la konkorda ho opiniaun husi FM nian kona ba lingua Portugues sai kauza principal ba dezempregu iha rai laran.
“Hau la konkorda, tanba menguasai bahasa salah satu kompetensia skill para ema ida atu tama pasar trabalha, lingua nudar instrumentu trabalhu, ne’e duni ema ida wainhira atu ba servisu nia tenke preparadu, hau hatene ema Timor barak mak seidauk hatene kona ba lingua ne’e, maibe tenki aprende,” dehan Deputadu Amaral.
Tuir nia, lingua Portugues alende lian Tetun, sai lian ofisial iha Timor-Leste ne’e garantia iha tanba ne’e hakarak ka lakohi tenke estuda no aprende to’o hatene.
“Ne’ebe la’os tanba lingua mak numeru dezempregu aumenta, maibe tanba governu la mobiliza investimentu direita ba ema estranjeiru,” Deputadu ne’e katak.
