“Kareta publiku hamutuk 63 hetan tuda, no kareta sira ne’e pertense husi ema sira nebe la hatene buat ida. Rezulta mos uma iha teritoriu nasional hitu maka ema sunu; sunu ema nia uma ne’ebe la hatene buat ida. No polisia nia kareta lima hetan estragus no polisia nain lima hetan kanek todan no joven ida mate no agora dadaun halo hela investigasaun,” informa Komandante Jeral Polisia Nasional Timor-Leste (PNTL), Komisariu Longuinhos Monteiro (16/07) hosi nia PNTL HQ iha Kaikoli, Dili.
Ho situasaun ida ne’e, oras ne’e dadaun PNTL blokeia tiha Sede Comite Central Fretilin (CCF) nune’e bele prevene ema atu labele provoka situasaun, e membru polisia barak mak halo seguransa iha fatin ne’e.
“Polisia sei nafatin mantein seguransa, no husu komunidade nia kontribuisaun atu bele kolabora ho polisia, atu bele kria estabilidade, agora dadaun ami blockea hela CCF, atu nune’e ema labele tama arbiru no labele kria situasaun ne’ebe maka ita hotu la espera,” dehan PNTL Komisariu Monteiro.
Iha lidun seluk Deputada Josefa Alvares Soares, lamenta ho asaun ne’ebe maka agora dadaun mosu iha rai laran, tanba ne’e husu ba PNTL atu bele fo asistensia ne’ebe maka masimu ba iha komunidade sira.
“Polisia tenke atua ho profesionalismu, tanba ema ba ne’e la’os ho tudik maibe ba ho fatuk, ne’e duni polisia tenke foti medidas ne’ebe maka diak liu, atu bele evita situasaun ne’ebe maka manas,” sujere Deputada ne’e.
Tuir nia, PNTL blockea Sede CCF ne’e hanesan maneira ne’ebe diak atu bele evita konsentrasaun de militantes iha fatin ne’eba para depois bele hasoru malu ho ema seluk ne’ebe maka kontraria ho sira.
Deputada ne’e mos fo apelu ba komunidade sira, atu labele kria violensia no krimi iha rai laran ona, tanba situasaun agora ne’e mundu hakarak hare estabilidade iha Nasaun Timor-Leste.
