“Sira fo 10 mil euro, atu suporta setor saude ninian, no 10 mil i tal euro atu hare ba labarik sira ne’ebe maka mal nutrisaun,” hateten Vise Ministru Finansas (MF), Rui Hanjam, (05/07), nia knar fatin MF, Palasiu Governu, Dili.
Vise Mnistru ne’e espera katak, ho ajudus ida ne’e bele hadia netik kondisaun saude ne’ebe dalabarak sai preokupasaun ba komunidade sira durante ne’e.
“Agradese tanba bele tulun hadia jestaun saude no bele aumenta tan suplai ba aimoruk ninian no mos formasia, atu nune’e bele ajuda oituan,” Vise Hanjam agradese.
Iha fatin hanesan Embaixador Uniaun Europeia, Juan Carlos Rey Salgado, katak setor saude nudar asuntu ne’ebe maka importante no presiza tau matan, tanba ne’e intergadu ho ema nia vida.
“Hau hakarak ajuda iha setor saude no MDG tanba saude ne’e importante liu, e komunidade Timor-Leste bele asesu ba saude ne’ebe maka diak, no ba labarik ne’ebe maka hetan mal nutrisaun ne’e kestaun ne’ebe maka presiza ema hotu nia tulun,” dehan Embaixador Salgado.
Iha okaziaun hanesan Diretor Jeral Ministeriu Saude (DJ-MS), Agapito da Silva, ajudus ida ne’e importante tebes ba MS, tanba setor saude nudar areas ida ne’ebe krusial liu.
“Ne’e duni apoiu ne’ebe maka agora fo ne’e bele hamenus todan ministeriu nian ne’ebe durante ne’e hasoru,” dehan Diretor Jeral ne’e.
