Alende atende membru Polisia Nasional Timor-Leste (PNTL) inklui sira nia familia sira, Klinika PNTL nee mos loke ba komunidade sira hodi halo konsulta ba sira nia saude.
“Klinika ne’e estabelese jeralmente ba membru Polisia Nasional Timor-Leste ho nia familia atu halo konsulta, maibe ami mos la taka dalan ba komunidade sira, liu-liu sira ne’ebe besik, sira ne’ebe urgensia mai ami nia fatin nudar pesoal saúde ami mos labele menolak ami tenke atende sira bazea ba motto ne’ebe iha katak ‘servi no proteze povu la ses husi saúde’,” dehan Xefe Saúde PNTL, Inspektor Abilio de Araujo Gonsalves, (02/07), iha Kaikoli, Dili.
Nia dehan, total pesoal saude ne’ebe agora dadaun hala’o hela knar iha klinika ne’e hamutuk nain lima, kompostu husi Emfermeirus nain ida no parteira nain ida husi instituisaun PNTL rasik, e tinan oin sei aumenta tan mediku geral nain lima.
Alende fo konsulta ba moras ba-bain, sira mos atende feto polisia ne’ebe isin rua hodi halo cek up ba sira nia kondisaun inklui hakarak tuir programa Planeamentu Familiar (PF).
“Ba futuru ami sei loke luan liu tan klinika ne’e nune’e membru polisia feto ne’ebe presiza emerjensia atu partus, bele partus deit iha klinika ne’e,” dehan Xefe Saude ne’e.
Hafoin inagura klinika ne’e, kada loron sira rejistu pasiente hamutuk 20 resin, maioria moras malaria no Infeksi Saluran Pernapasaun (ISPA).
Iha parte seluk Membru Polisia Feto, Elvi Goncalves katak, klinika ne’e importante tebes ba membru PNTL sira, nune’e bainhira hetan acidente no moras derepente ruma bele halo tratamentu kedas tanba iha klinika ne’e fasilidade kompletu hanesan aimoruk no seluk tan.
“Hanesan membru PNTL ami sente orgulho tebes tanba bainhira ami hetan moras ruma lapersiza lao dok ami mai konsulta direitamente iha ami nia klinika ne’ebe besik hela,” dehan Polisia Feto ne’e.
