Furak no kapas edifisiu foun Ministeriu Solidaridade Sosial (MSS) nian ne’ebe ho andar tolu kompleta kedas ho lift, ne’ebe bele asesivel ba ema hotu, maibe kuitadu defisiente sira labele asesu to’o iha leten tanba sira ho deit kadeira roda (kursi roda).
“Hau hanoin edifisiu foun ne’e kapas tebes, maibe ami ne’ebe ho kadeira roda labele sa’e to’o iha leten, maske iha ranpa maibe as liu ami atu tama rasik araska, so ema ida dudu tanba ami laiha forsa no iha haris fatin mos ami tama araska,” dehan Defisiente Joel Morais Fernandes, ne’ebe partisipa iha serimonia inagurasaun ba edifisiu foun ne’e, (05/07), iha Kaikoli, Dili.
Maske nune’e sira kontente, tanba edifisiu ida ne’e asesivekl hotu ba sira atu trata sira nia dokumentus ruma iha ne’e.
Iha oportunidade hanesan, Defisiente Tomas da Silva Aparicio hateten, edifisiu ida ne’e refleta duni ba sira ne’ebe matan aat, maibe difikulta ba sira mak kona ba haris fatin.
“Husu ba governu iha futuru bainhira harii edifisio publiku ruma tenke hare importante asesivel ba ema hotu, tanba ema ho kondisaun defisiente mos iha direitu atu asesu ba informasaun ruma iha fatin publiku sira hanesan ne’e,” Defisiente Aparicio sujere.
Iha parte seluk Diretor Nasional Asistensia Sosial MSS, Amandio Amaral Freitas dehan iha Timor-Leste fatin publiku ne’ebe asesibel ba ema defisiente liu –liu defisiente ho kadeira roda sei menus tebes hanesa ospital la asesibel ba ema defisiene tanba ne’e ba futuru presiza halo tranformasaun diak liu tan atu ema ho kondisaun defisiente sira bele ba ho kursi roda no aitonka mos bele la persiza ema seluk atu hit inklui mos transporte publiku.
“Ita hare fisikamente iha Timor laran iha edifisio publiku ne’ebe asesibel ba ema ho kondisaun defisiente mak hanesan edifisio Ministerio Negosio Estrangeirus (MNE) no espesial ba edifisio foun MSS nian tanba kompleta ho lif karik iha fatin seluk hau seidauk hare,” dehan Diretor Freitas.
