Promove igualidade de jeneru alende iha vida politika no saude, mos iha setor hotu, nune’e iha balansu entre feto ho mane, sira nia partisipasaun ba dezenvolvementu nasaun nian iha future.
“Ami na partidu CNRT hala’o ona programa barak hodi promove igualidade jeneru no sei kontinua nafatin, la’os atu hapara maibe sei iha programas lubuk bo’ot ida mak tenke halo atu kapasita feto sira iha area oi-oin la’os politika deit,” dehan Reprezentante Partidu Congresu Nasional Rekonstrusaun Timor (CNRT),
Idelta Maria Rodrigues, bainhira halo diskusaun entre liders partidus politiku sira ho estudante Universidade Nasional Timor Lorosa’e (UNTL) kona ba asuntu jeneru nian, (28/06), iha salaun Auditorium UNTL Liceu, Dili.
Tuir nia, asuntu jeneru importante ba estudante UNTL sira atu hatene, liu-liu sira iha Sentru Estudus Jeneru, sira presiza hatene programa klaru husi Parpol sira konaba asuntu ne’e bainhira kaer ukun durante tinan lima mai.
UNTL foin primeira ves halo diskusaun ho Parpol sira kona asuntu jeneru nian, e nudar jerasaun foun estudante sira presiza hatene programa partidus sira nian bainhira kaer ukun.
“Ita espera katak ita nia partidos politikus sira ne’ebe atu ukun iha tinan lima mai sira bele reforsa liu tan setor ida ne’e ,nune’e ba oin Timor-Leste bele respeita ema hotu-hotu nia direitu, laiha diskriminasaun entre feto no mane hodi dezenvolve pais ida ne’e sai diak liu tan,” dehan Reitor UNTL, Aurelio Guterres.
Entretantu Reprezentante Partidu Fretelin, Ilda Maria da Conceiçao hateten, partisipasaun feto iha vida politika oras ne’e dadaun sei menus, tanba feto barak mak sei hela deit iha uma.
“Ami hetan dadus feto barak mak sei tauk nia familia ka la’en bainhira atu partisipa iha vida politika, tanba ne’e husu ba familia sira atu fo apoiu ba feto sira, tanba feto sira mos bele foti desizaun politika, e agora tempu ona atu feto sira kore aan husi presaun ne’ebe iha,” dehan Reprezentante Partidu Fretilin ne’e.
Diskusaun ne’e rasik taka ho asina komprimisiu entre UNTL ho Papol sira, konaba asuntu jeneru nian, e partidu CNRT la asina komprimisiu ne’e, tanba tuir CNRT,sira halo ona programa barak atu promove igualidade jeneru durante tinan lima nia laran.*
