Ministeriu Edukasaunn (ME) laiha orsamentu kontijensia atu hare ba fasilidades eskola nian ne’ebe to’o agora sei falta barak.
Tuir Diretor Jeral Ministeriu Edukasaun, Apolinario Magno katak durante ne’e Ministeriu depende liu ba orsamentu husi Gabinete Primeiru Ministru nian ho montante US$ 20 milioens.
“Mais orsamentu ida ne’e konforme hau hatene katak, ema uza hotu ona tanba foin dadauk anin sobu eskola barak teb-tebes iha Maubise, Ainaro , Same, Baucau no fatin seluk tan e agora ministeriu labele halo buat ida,” dehan Diretor Jeral,Magno, (28/06), iha Vilaverde, Dili.
Nia hato’o kestaun ne’e relasiona ho eskola Ensino Baziku Mehara, Distritu Lospalos ne’ebe estudante sira tur deit rai hodi tuir prosesu aprendijazen.
Entertantu tuir Xefe Suku Fatuhada ,Marcelino Soares , ME mak laiha planu ne’ebe diak, liu-liu diresaun ne’ebe toma konta kona ba asuntu ne’e.
“La iha planu ne’e mak buat ne’e sai hanesan ne’e ga, agora labarik sira tur fali iha rai hakruk to’o dolar didiak mak hakerek hanesan deit, la tama iha nia ulun,” dehan Xefe Suku ne’e.
Nia informa, Eskola Primaria Fatuhada rasik agora ddaaun ho kondisaun aat tanba fondasi eskola nian dodok hotu ona.
“Uluk kedas hau hatama proposta para atu mai halo rehabilitasaun eskola ne’e, tanba eskola ne’e halo iha 1982 to’o agora seidauk halo rehabilitasaun, ninia fondansi ne’e mos okos monu hotu e bainhira udan bee tama ba eskola laran,” Xefe Suku ne’e katak.
Iha sorin seluk Kordenador Timor-Leste Coalition Of Education (TLCE), Matias dos Santos sujere ba ME atu estandariza eskola hotu iha rai laran, nune’e estudante sir abele tuir prosesu aprendijazen.
“Koalia kona ba infraestrutura, eskola iha teritoriu Timor laran tomak kuaze la iha estandar,espera Governu foun nebe mak mai sir abele estandarija eskola ho modelu nebe mak kualidade diak,” Kordenador ne’e esperansa.
