Ministeriu Saude (MS) iha ona planu atu fo bolsu estudus ba estudante nain 40, prioridade ba kandidatu husi sukus, nune’e bele responde preokupasaun komunidade sira kona ba pesoal saude ne’ebe limitadu durante ne’e iha sira nia suku laran.
Tuir Xefe Rekursu Humanu MS, Duarte de Araujo dehan, sira nain hirak ne’e sei hasai hotu iha area parteira nian durante tinan tolu, tanba iha sukus presiza liu mak parteira.
“Se ita la identifika kandidatu sira husi sukus atu ba eskola, entaun numeru pesoal saúde sei menus nafatin iha sukus, ezemplu kandidatu sira husi Dili deit entaun aban bainrua sira eskola hotu ita haruka ba iha sukus sira lakohi, obrigatorio ba maibe lakleur sira muda entau komunidade iha sukus kontinua ejiji,” dehan Xefe de Araujo, (21/06), iha Kaikoli, Dili.
Nia hatutan, bolseirus nain 40 ne’e sei ba hasai Diploma III iha Sekolah Tinggi Ilmu Kesehatan (STIKES) Kupang, Indonezia.
Maske parte MS seidauk halo estudus ida kona ba eskola ne’e, maibe sira garante katak hafoin akaba sira nia estudus iha STIKES, bele sai pesoal saude ne’ebe iha kualidade no professional.
Kandidatu sira ne’ebe sei konkore iha prosesu rekrutamentu ne’e tenke mai husi sukus sira ne’ebe durante ne’e infrenta problema falta pesoal saúde hanesan iha Distritu Viqueque, Covalima, Oecuse no seluk tan.
Nia espera katak, rekursu ne’ebe forma dadaun, bele atinji planu ne’ebe ministeriu relata ona iha Planu stratejia Dezenvolvimentu Nasional (PEDN) iha setor saúde tinan 2013 to’o 2030, hanesan estabelese postu de saúde iha sukus ida –ida komplentu ho mediku ida, parteira rua inklui mos enfermeiru ida hodi fo asistensia saúde ba dois mil populasaun.
Iha parte seluk Estudante Universidade Nasional Timor Lorosa’e (UNTL) Fakuldade Parteira, Nazaria Ximenes konkorda ho planu ida ne’e hodi hili kandidatu sira husi sukus, nune’e bainhira remata sir abele servi iha sira nia ida-idak nia suku.
“Hau hanoin ida ne’e diak tebes, atu nune’e sira ne’ebe ba estudu fila mai bele fo asistensia saúde ba inan feto sira iha area rurais ne’ebe durante ne’e susar atu asesu ba fasilidade saúde,” dehan Estudante Ximenes.
