Atu responde ba preokupasaun husi familia pasiente sira ne’ebe durante ne’e hola rasik kombustivel ba ambulansia hodi tula moras, tanba ospital laiha kombustivel, oras ne’e dadaun Ministerio Saúde (MS) distribui ona kombustivel ba Ospital Referal (OR) no Sentru Saúde (SS) sira hotu iha teritoriu tomak.
“Ministerio Finansas fo sai ona orsamentu pagamentu ne’eduni ami hato’o ona ba kompania rua (kompania Eto no Esgas) ne’ebe atu drop kombustivel ba Ospital Referral sira no Sentru Saúde sira ne’ebe durante ne’e falta kombustivel,” hateten Diretor Nasional Administrasaun Logistica MS, Leão Borges, (21/06), iha Kaikoli, Dili.
Diretor ne’e dehan, durante ne’e prosesu distribuisaun kombustivel tarde ba iha OR no Sentru Saude sira tanba prosesu jestaun no administrasaun mak tarde.
Ospital referral hirak ne’ebe durante ne’e falta kombustivel mak hanesan OR Baucau, Sentru Saude Lospalos, Viqueque, Sentru Saude Maukatar, Servisu Saude Distrital Distritu Suai no seluk tan.
Nia mos rezeita informasaun ne’ebe dehan, funsionariu publiku ihaMS abandona servisu, “informasaun ida ne’e lalos tanba funsionario publiku ne’e la’os politiku nian maibe hanesan motor estadu nian, halai nafatin maske mandatu governu hotu,” Diretor ne’e katak.
Entretantu Enfermeiru Sentru Saude Maukatar (SSM), Adelino Feliciano via telephone hateten, semana ida resin ona sentru saude refere laiha kombustivel.
“Bainhira iha moras ruma atu tula ba fasilidade saude, familia pasiente mak ba sosa mina depois ense ba ambulansia foin ba tula moras ne’e, kuaze semana rua ona,”hateten Enfermeiru Feliciano.
Tuir Enfermeiru ne’e, problema falta kombustivel la’os deit iha SSM, maibe mos iha Servisu Saude Distrital (DHS) Distritu Suai, inklui mos iha Ospital Referal.
