“Ami nudar misaun ne’ebe netral, ami sei hare lei eleitoral, hahalok no ambiente media inklui mos partidus politikus sira, tanba ne’e ami sei fahe ami nia observador sira ba distritu hotu no sira sei halo observasaun ba preparasaun eleisaun no iha loron eleisaun,” dehan Xefe MOE-UE, Fiona Hall, (08/06), iha konferensia imprensa, iha Sentru Konvensaun Dili (DCC).
Xefe Hall dehan, hafoin eleisaun remata, MOE sei anunsia no deklara sai rezultadu observasaun ne’ebe sira hetan durante iha prosesu eleisaun parlamentar. “Ami sei fo sai relatoriu final ba publiku inklui mos rekomendasaun ba prosesu eleisaun iha future,”.
Sira mos sei halo avaliasaun enkuadramentu legal kona ba servisu administarsaun eleitoral, servisu media, knar sosiedade sivil inklui mos partisipasaun feto, Xefe Hall afirma.
Observadores nain 70 ne’e kompostu husi membru Parlamentu Europeia, Suisa, no Noruegia.
Entretantu tuir Xefe Departamentu Informasaun Publiku iha Sekretariadu Tekniku Administrasaun Eleitoral (STAE), Saturnino Exposto Babo katak prezensa MOE hodi halo observasaun ba iha eleisaun parlamentar importante tebes, tanba avaliasaun no assessment ne’ebe STAE ho CNE halao iha Timor-Leste tuir duni padraun internasional.
“Esperensia hatudu mai ami desde tinan 2007 to’o agora, katak Uniaun Europeia nia observasaun sempre kompletu, sira fo ideias ne’ebe furak tebes hodi nune’e ita hadia prosesu eleisaun desde tinan 2007 to’o mai agora tanba ne’e prezensa UE inportante tebes liu –liu observadores sira,” hateten Xefe Babo.
Nia dehan, MOE-UE hala’o ona observasaun ba eleisaun prezidensial ne’ebe hatudu rezultadu positive tebes, tanba ne’e iha prosesu eleisaun parlamentar sira mos sei halao kobertura iha 13 distritus, e espera katak bele la’o ho diak.
